رحیم یار خان پولیس نے کچے کے علاقے میں انٹیلیجنس بیسڈ ٹارگٹڈ آپریشن کیا جس کے نتیجے میں اندھڑ گینگ کا سرگرم رکن  کچے کا خطرناک ڈاکو ہلاک ہو گیا۔

 ترجمان پولیس کے مطابق ہلاک ڈاکو کی شناخت مختار عرف ودھایا شیخ کے نام سے ہوئی، ڈاکو کے قبضہ سے کلاشنکوف اور سینکڑوں گولیاں برآمد ہوئیں۔

ڈاکو پولیس کو مطلوب ہنی ٹریپ کے ذریعے اغواء برائے تاوان کا مرکزی ملزم نکلا۔

ہلاک ڈاکو ،ڈکیتی،پولیس پر حملوں کی متعدد وارداتوں میں مطلوب اندھڑ گینگ کا مرکزی کارندہ تھا۔

ترجمان پنجاب پولیس کے مطابق آپریشن ڈاکوؤں کی موجودگی کی خفیہ اطلاعات پر سندھ سے متصل بستی سعید عباسی کے عقب موضع داعوالہ میں کیا گیا۔

پولیس کو بکتر بند گاڑیوں ،ایلیٹ کمانڈوز، نائٹ ویژن گاگلز اور بھاری ہتھیاروں کی مدد حاصل تھی۔

ڈاکوؤں کی موجودگی کی اطلاع پر پولیس نے کاروائی کی تو مسلح ملزمان نے پولیس پر اندھا دھند فائرنگ کر دی۔

رحیم یار خان پولیس کی بھرپور جوابی کارروائی میں خطرناک ڈاکو مختار شیخ ساتھیوں کی فائرنگ سے ہلاک ہو گیا جبکہ اس کے دیگر ساتھی اندھیرے کا فائدہ اٹھاتے ہوئے کماد کی فصل میں فرار ہو گئے۔

پولیس کا کہنا ہے کہ رحیم یار خان پولیس نے تمام علاقے کا گھیراؤ کرتے ہوئے سرچ آپریشن شروع کر دیا ہے۔

ڈی پی او رضوان عمر گوندل نے کہا کہ رحیم یار خان پولیس کچے سے دہشت گردوں ،ڈاکووں ،اور شر پسند عناصر کے مستقل خاتمہ کے مشن پر گامزن ہے۔