سینیئروزیرمریم اورنگزیب نے کہا ہے کہ بھارت میں کسانوں کے فصلوں کی باقیات کو جلانے سے بڑے پیمانے پر فضائی آلودگی میں اضافہ ہوا۔ 

مریم اورنگزیب نے بیان میں کہا کہ بھارت سے تیز ہواؤں کا رخ مسلسل تبدیل ہونے سے فضائی آلودگی کے انڈیکس میں لاہورکی پوزیشن بھی تبدیل ہوتی رہی۔ اسموگ سے متعلق تازہ ترین صورتحال پنجاب حکومت کی گرین ایپ پرجاری کی جارہی ہیں۔

انھوں نے کہا کہ ماحولیات کے تحفظ کا ادرے میں قائم ‘وار روم’ چوبیس گھنٹے جنگی بنیادوں پرکام کر رہا ہے، مانیٹرنگ اور کلین اپ آپریشن بھی مسلسل جاری ہے، عوام احتیاطی تدابیرپرسختی سے عمل کریں، بزرگ، بیمار اوربچے خاص طورپراحتیاط کریں۔

مریم اورنگزیب نے شہریوں سے اپیل کی ہے کہ ماسک لازمی پہنیں، غیر ضروری طورپرگھروں سے نہ نکلیں، وزیراعلی مریم نوازشریف صورتحال کی مسلسل نگرانی کررہی ہیں، اسموگ سے بچاؤکے حکومتی پلان پرسختی سےعمل درآمد جاری رہے گا۔

سینیئرصوبائی وزیرنے کہا کہ کسان مونجی اورفصل کی باقیات نہ جلائیں، خلاف ورزی پر گرفتاری اورجرمانوں کا سلسلہ جاری رہے گا، تعمیراتی کام والے مقامات پر ماحولیاتی تحفظ کے ادارے کی جاری کردہ ہدایات پرسختی سے عمل کریں۔

واضح رہے کہ بھارت سے آنے والی تیزہواؤں کے باعث لاہورفضائی آلودگی انڈیکس میں پہلے نمبرپرآ گیا۔ آئندہ سات دن کا بھارت سے تیز ہواؤں سے متعلق نقشہ بھی جاری کیا گیا ہے۔

بھارت کے دو شہر دوسرے اورتیسرے نمبرپرآگئے۔ 450 اسکورسے دہلی دوسرے اور201 اسکورسے کلکتہ تیسرے نمبرپرہے۔ بھارت سے چلنے والی ہواؤں کی رفتار ڈھائی سے سات کلومیٹر فی گھنٹہ ریکارڈ کی گئی، امریکی خلائی ادارے ناسا کا ہواؤں کا رخ دکھانے والا نقشہ بھی جاری کیا گیا۔