ڈائریکٹرجنرل سندھ بلڈنگ کنٹرول اتھارٹی عبدالرشید سولنگی نے شارع فیصل پر جاری بیوٹی فیکیشن کے کاموں کا جائزہ لیا۔

ڈسٹرکٹ ملیر،ڈسٹرکٹ ایسٹ کے ڈائریکٹرز، ڈپٹی ڈائریکٹرز سمیت تمام متعلقہ افسران بھی موقع پر موجود تھے، ڈی جی نے عمارتوں کے مکینوں سے بھی ملاقاتیں کی۔

ڈی جی ایس بی سی اے نے کہا کہ سندھ بلڈنگ کنٹرول اتھارٹی نے شاہراہ فیصل پر واقع 24 عمارتوں سمیت اردگرد ماحول کی بیوٹیفکیشن مہم کا آغاز کیا تھا جو کہ ایک ہفتےمیں مکمل کر دیا جائے گا،

انہوں نے کہا کہ ائیرپورٹ سے ایف ٹی سی بلڈنگ تک بدنما بیرونی ظاہری حالت کی حامل رہائشی و تجارتی عمارتوں، پیٹرول پمپس وغیرہ پر رنگ و روغن اور تزئین و آرائش کی جا رہی تھیں.

صاف ستھری عمارتیں اور صحت مند ماحول شہریوں کے ذہنوں کی مثبت عکاسی کرتی ہیں اورغیر ملکی مہمانوں پر اثرانداز ہونےکا خوشگوار پہلو ہے۔

 انہوں نے کہا کہ وزیراعلیٰ سندھ اور وزیربلدیات سعید غنی نے شاہراہ فیصل پر عمارتوں کی بیرونی حالت کو درست کرنے کی زمیداری سندھ بلڈنگ کنٹرول اتھارٹی کو سونپی تھی۔

ڈی جی رشید سولنگی نے کہا کہ بیوٹی فکیشن مہم میں پہلی 20 عمارتوں کی نشاندہی کی گئی تھی اب ان کی تعداد 20 سے بڑھا کر 24 کر دی گئی ہے۔

ڈی جی رشید سولنگی ایس بی سی اے نے مزید کہا کہ ڈسٹرکٹ ملیر میں واقع 14میں سے 9 بلڈنگز کا کام مکمل ہوچکا ہے جبکہ ڈسٹرکٹ ایسٹ میں 10 میں سے 5 عمارتوں کا کام مکمل کر دیا گیا ہے۔