کے پی حکومت نے صوبے میں اپنی پاور ٹرانسمیشن لائن بچھانے کے لئے نجی کمپنی سے معاہدہ کیا ہے۔

وزیراعلیٰ ہاؤس پشاور میں معاہدے پر دستخط کرنے کی تقریب کا انعقاد کیا گیا، پیڈو اور نجی کمپنی نیٹراکون کے حکام نے معاہدے پر دستخط کیے۔

پہلے مرحلے میں مٹلتان سے مدین تک 40 کلومیٹر ٹرانسمیشن لائن بچھائی جائے گی، ٹرانسمیشن لائن کا منصوبہ 8 ارب روپے کے تخمینہ لاگت سے ڈیڑھ سال میں مکمل ہو گا۔

بجلی نیشنل گرڈ سے رعایتی نرخوں پر مقامی صنعتوں کو فراہم کی جائے گی، منصوبے کے پہلے مرحلے کی تکمیل سے صوبائی حکومت کو سالانہ 7 ارب کی آمدن ہو گی۔

سوات کوریڈور ٹرانسمیشن لائن منصوبے کے فیز 2 کے تحت لائن بچھائی جائے گی، مدین سے چکدرہ تک مزید 80 کلومیٹرلائن بچھائی جائے گی، سوات میں سیکڑوں میگاواٹ کے حامل ہائیڈرو پاور پراجیکٹس پر کام جاری ہے۔

معاہدے کے دستخط کرنے کی تقریب کے موقع پر وزیر اعلیٰ علی امین گنڈاپور نے کہا کہ منصوبہ صوبے کی پائیدار بنیادوں پر ترقی کے لئے انتہائی اہم ہے۔

انہوں نے کہا کہ منصوبے کی تکمیل سے توانائی اور صنعت کے شعبوں میں انقلاب آئے گا، حکومت اپنی بجلی کو سستے نرخوں پر مقامی صنعتوں کو فراہم کرے گی۔

ان کا کہنا تھا کہ اقدام سے سرمایہ کاروں کو صوبے کی طرف راغب کیا جا سکے گا۔

وزیر اعلیٰ خیبر پختونخوا علی امین گنڈاپور نے مزید کہا کہ اپنی پاور ریگولیٹری اتھارٹی کے قیام پر بھی کام کر رہے ہیں۔