سینیٹر شیری رحمان نے سینیٹ اجلاس میں پی ٹی آئی اور اس کے رہنماؤں کے حوالے سے سخت موقف اختیار کرتے ہوئے کہا کہ پی ٹی آئی کے لیے فیض یاب ہونے کا وقت گزر چکا ہے۔

انہوں نے مزید کہا کہ اب یہ لوگ کسی ناجائز طریقے سے فائدہ نہیں اٹھا سکتے۔

شیری رحمان نے 9 مئی کے واقعات کا ذکر کرتے ہوئے کہا، جو کچھ 9 مئی کو پی ٹی آئی نے کیا، وہ کسی دوسری سیاسی جماعت نے نہیں کیا۔ مظاہرین کو آنسو گیس کے شیل کہاں سے ملے؟”

انہوں نے اس دوران سوال اٹھایا کہ جن چھاؤنیوں سے شہیدوں کی میتیں اٹھائی گئیں، انہیں جلایا گیا، اور کہا کہ “ہم نے کبھی آزادی نہیں مانگی جیسے آپ لوگ مانگ رہے ہیں۔

سینیٹر شیری رحمان نے اپنے خطاب میں پی ٹی آئی کی قیادت پر الزام عائد کیا کہ پی ٹی آئی نے ریاست پر حملہ کیا اور اس کے شواہد موجود ہیں۔

انہوں نے یہ بھی کہا کہ پی ٹی آئی نے انصاف کے نظام سے ایک فرد واحد کو نکالنے کی بات کی ہے، اور ہم عوام کو چھوڑ کر نہیں بھاگتے۔

شیری رحمان نے پیپلز پارٹی کے موقف کا دفاع کرتے ہوئے کہا کہ “ہم نے سڑکوں پر ڈنڈے کھائے لیکن ڈنڈے نہیں کھلوائے، اور ہمیشہ عوام کے ساتھ کھڑے رہے۔

شیری رحمان نے پی ٹی آئی کی اقتصادی پالیسیوں پر بھی کڑی تنقید کی اور کہا کہ پی ٹی آئی نے آئی ایم ایف کو خط لکھا کہ ملکی معیشت تباہ ہو جائے۔

شیری رحمان نے یہ بھی کہا کہ مذاکرات کے لیے یکطرفہ شرائط نہیں ہو سکتیں اور پی ٹی آئی کی قیادت پر الزام لگایا کہ بانی پی ٹی آئی کہتے ہیں کہ میں ہوں تو سب کچھ ہے۔

سینیٹر شیری رحمان نے اپنے خطاب میں یہ بھی واضح کیا کہ “بانی پی ٹی آئی کے سیل میں جو کچھ ہے، وہ ہم ہٹانا نہیں چاہتے۔ اس کے ساتھ ہی انہوں نے پی ٹی آئی کی قیادت کی جانب سے گالم گلوچ کی سیاست اور ڈنڈے لے کر چلنے کے رجحان کی مذمت کی۔