وفاقی وزیر برائے تجارت جام کمال کی زیر صدارت ٹی ڈی اے پی (تجارت و سرمایہ کاری کی ترقی کے ادارے) کے بورڈ کا اجلاس منعقد ہوا۔

اجلاس میں ادارے کی ساخت اور کارکردگی میں بہتری کے لیے اصلاحات پر زور دیا گیا۔

اجلاس میں معروف بزنس مین زبیر موتی والا اور دیگر اہم اراکین نے شرکت کی۔ اجلاس میں 14 نکاتی ایجنڈے کے تحت ٹی ڈی اے پی کی تنظیمی کارکردگی کا جائزہ لیا گیا۔

 وزیر تجارت نے کہا کہ ٹی ڈی اے پی کی ساخت کو مزید مؤثر بنانے کی ضرورت ہے تاکہ ادارہ بہتر طور پر کام کر سکے اور ملک کی تجارتی سرگرمیوں کو فروغ دے سکے۔

جام کمال نے ٹیکسپو کے انتظامات پر بھی تشویش کا اظہار کیا اور کہا کہ غیر ملکی مہمانوں کی موجودگی میں سیکیورٹی کے مضبوط انتظامات انتہائی ضروری ہیں۔

انہوں نے ٹیکسپو کے حفاظتی انتظامات پر اپنی تشویش کا اظہار کرتے ہوئے مستقل طور پر ڈائریکٹر جنرل سیکیورٹی (ڈی جی سیکیورٹی) تعینات کرنے کی ہدایت دی۔

وزیر تجارت نے ٹیکسپو کے ایونٹ مینجمنٹ کے طریقہ کار میں تبدیلی کی ہدایت دی اور اس بات پر زور دیا کہ آئندہ ایسے ایونٹس میں کوئی کمی نہ رہ جائے۔

انہوں نے ٹیکسپو میں ناقص انتظامات پر تنقید کرتے ہوئے کہا کہ ایونٹ کے انتظامات میں بہتری لانا ضروری ہے تاکہ عالمی سطح پر ملک کی نمائندگی بہتر طریقے سے کی جا سکے۔

جام کمال نے لاہور اور کوئٹہ دفاتر کی اپ گریڈیشن اور اسلام آباد میں ایک نیا دفتر تعمیر کرنے کی منظوری دی۔

ان کا کہنا تھا کہ اس اقدام سے ادارے کی کارکردگی میں مزید بہتری آئے گی اور ملک بھر میں تجارتی سرگرمیاں بڑھیں گی۔

وزیر تجارت نے معدنیات کے شعبے کو صنعت کا درجہ دینے اور نمائش کے لیے اقدامات کی تجویز دی۔ انہوں نے کہا کہ معدنیات کے شعبے کو صنعتی درجہ دینے سے ملکی معیشت کو فروغ ملے گا۔

علاوہ ازیں، انہوں نے بین الاقوامی نمائشوں کے انتخاب کے لیے لاگت اور اہمیت کی جامع رپورٹ طلب کی۔

جام کمال نے ٹی ڈی اے پی بورڈ کی ذیلی کمیٹیوں کی تعداد میں اضافے کی ہدایت دیتے ہوئے کہا کہ “بورڈ کے فیصلوں پر عملدرآمد کی رفتار کو تیز کیا جائے تاکہ ترقی کے عمل میں تیزی لائی جا سکے۔”

اجلاس کے اختتام پر وزیر تجارت نے واضح کیا کہ وہ ٹی ڈی اے پی کی اصلاحات اور انتظامات میں بہتری کے لیے بھرپور اقدامات کریں گے تاکہ ادارہ عالمی سطح پر پاکستان کے تجارتی مفادات کا مؤثر طور پر دفاع کر سکے۔