محکمہ داخلہ نے جیل میں قیدیوں کے PCO استعمال بارے اصول و ضوابط جاری کردیے، قیدیوں کوعزیزواقارب اوروکلا سے رابطے کیلئے آڈیو ویڈیوکال کی سہولت دی گئی ہے۔ 

محکمہ داخلہ کے مطابق قیدی پیرتا ہفتہ صبح 8 بجے سے شام 5 بجے تک PCO استعمال کرسکتے ہیں۔ جیل سپرنٹنڈنٹ تمام اسیران کو PCO سہولت فراہم کرنے کیلئے ہفتہ وار شیڈول جاری کریگا۔ ہرقیدی رابطے کیلئے زیادہ سے زیادہ 5 فون نمبر سسٹم میں رجسٹر کروا سکتا ہے۔

قیدی کو صرف خونی رشتہ داروں، اہلیہ اورلیگل کونسل سے رابطے کی اجازت ہے۔ سسٹم آپریٹرقیدی کی درخواست پر اُسی دن سپرٹنڈنٹ جیل سے تصدیق کے بعد PCO کی سہولت فراہم کریگا۔

دہشتگردی اورملک دشمن سرگرمیوں میں ملوث مجرمان کے علاوہ تمام قیدیوں کو PCO استعمال کی اجازت ہے۔ اسیران کو ایک ہفتے میں 60 سے 80 منٹ پی سی او استعمال کی اجازت ہوگی۔ متعلقہ بیرک انچارج کی تصدیقی سلپ پر ہی ہر قیدی کو PCO استعمال کی اجازت ملے گی۔

پی سی اواستعمال کیلئے قیدی اپنے پریزن مینجمنٹ انفارمیشن سسٹم پی پی اکاؤنٹ سے رقم منہا کروائیں گے۔ 18 سال سے چھوٹے اورناداراسیران کو PCO کی سہولت مفت فراہم کی جائیگی۔ جیل جرائم میں ملوث افراد یا نقص امن کے خطرے کے پیشِ نظرسپرنٹنڈنٹ کسی قیدی کی PCO سہولت بند کرسکتا ہے۔

متعلقہ ڈی آئی جی ریجن اطلاع موصول ہونے کے 3 یوم میں مناسب وجوہات کی روشنی میں PCO سہولت بحال کرسکتا ہے۔ جیل جرائم کے مرتکب قیدی کو پنشمنٹ بلاک میں بند کیا جائے گا اور PCO سہولت عارضی طور پر بند رہے گی۔ کسی قیدی کو کانفرنس کال کی اجازت نہیں ہو گی۔

انچارج اسسٹنٹ سپرنٹنڈنٹ جیل دورانِ کال کسی بھی نازیبا یا قابل اعتراض گفتگو پر کال منقطع کرنے کا مجاز ہے۔ نازیبا، ملک دشمن اورقابل اعتراض گفتگو پرمتعلقہ قیدی کی PCO سہولت عارضی طورپربند ہوگی۔ جیل سپرنٹنڈنٹ کسی قیدی کی PCO سہولت ایک ماہ تک بند کرسکتا ہے اس سے زیادہ مدت کی اجازت ڈی آئی جی ریجن دے گا۔

کوئی بھی قیدی فون بوتھ سے 6 ملا کر آئی جی جیل خانہ جات کمپلینٹ سیل میں مفت شکایت درج کروا سکتا ہے۔ خواتین، نوعمر اور سزائے موت کے قیدیوں کا PCO بوتھ انکے اپنے بارک میں ہوگا۔ تمام کالزکا ریکارڈ کم از کم ایک ماہ تک محفوظ رکھا جائے گا۔ ایک اسیرکا صرف ایک PCO اکاؤنٹ بنایا جائیگا اورخلاف ورزی کی صورت میں متعلقہ حکام کیخلاف کارروائی ہوگی۔

سپرنٹنڈنٹ جیل ماہانہ بنیادوں پرPCO سسٹم کی کمپیوٹرائزڈ فنانشل رپورٹ پریزن فاؤنڈیشن کو بھجوائے گا۔ سیکرٹری داخلہ پنجاب نے جاری کردہ قواعد و ضوابط پرسختی سے عملدرآمد کی ہدایت کی ہے۔