وزیراعظم نے ہدایت کی ہے کہ اووربلنگ کسی طورقابل قبول نہیں، اووربلنگ میں ملوث افسران کیخلاف سخت کارروائی ہو گی۔ بجلی چوری کی روک تھام کے لئے ٹھوس اقدامات کیے جائیں۔ 

وزیراعظم شہباز شریف کی زیرصدارت بجلی تقسیم کارکمپنیوں کی کارکردگی کے حوالے سے جائزہ اجلاس منعقد ہوا۔ اجلاس میں لاہورالیکٹرک سپلائی کمپنی ( لیسکو) پشاورالیکٹرک سپلائی کمپنی (پیسکو) اورفیصل آباد الیکٹرک سپلائی کمپنی (فیسکو) کے امورزیربحث آئے۔

وزیراعظم نے اجلاس میں ہدایت کی کہ کہا کہ اسمارٹ میٹرکی تنصیب کا کام جلد ازجلد مکمل کیا جائے تاکہ بلنگ کے نظام میں شفافیت لائی جاسکے۔ اووربلنگ کسی طور قابل قبول نہیں، اووربلنگ میں ملوث افسران کے خلاف سخت کارروائی ہو گی۔ بجلی چوری کی روک تھام کے لئے ٹھوس اقدامات کیے جائیں۔

وزیراعظم شہبازشریف نے بجلی تقسیم کارکمپنیوں کے چیف ایگزیکٹو افسران کی تعیناتی کے عمل میں سست روی پرتشویش کا اظہارکرتے ہوئے کہا کہ انتہائی شفاف عمل کے ذریعے بجلی تقسیم کارکمپنیوں کے چیف ایگزیکٹو افسران کی تعیناتی کا عمل جلد از جلد مکمل کیا جائے۔

انھوں نے کہا کہ بجلی تقسیم کارکمپنیوں میں افرادی قوت کی بھرتی میرٹ پرکی جائے، بھرتیوں کےعمل میں شفافیت پر کوئی کوتاہی برداشت نہیں کی جائے گی۔ نیپرا کے دیے گئےٹارگٹ کے حصول کے لئے تمام وسائل بروئے کار لائے جائیں۔

اجلاس میں لیسکو، پیسکو اورفیسکو کی کارکردگی پر تفصیلی بریفنگ دی گئی جس میں بتایا گیا کہ مالی سال 2024-25 میں نومبرتک لیسکو کی ریکوری 96.82 فیصد، پیسکو کی ریکوری 87.98 فیصد اور فیسکو کی ریکوری 97.57 فیصد رہی۔ مالی سال 2024-25 میں نومبر تک ٹرانسمشن اور ڈسٹری بیوشن لاسز کے حوالے سے لیسکو 13.04 فیصد، پیسکو 33 فیصد جبکہ فیسکو 6.01 فیصد ہے۔

بریفنگ میں بتایا گیا کہ لیسکو نے 223365 تھری فیز اسمارٹ میٹرز کی تنصیب کرنے ہیں جن میں سے 49470 کی تنصیب ہو چکی ہے، پیسکو نے 152559 اسمارٹ میٹرز کی تنصیب کرنی ہے جن میں سے 51173 کی تنصیب ہو چکی ہے۔ فیسکو نے 192311 اسمارٹ میٹرزکی تنصیب کرنی ہے جن میں سے 11276 کی تنصیب ہو چکی ہے، لیسکو، پیسکو اور فیسکو کے صارفین کو شکایت کے ازالے اور دیگر خدمات کے حوالے سے کال سینٹرز، ای میلز، ویب سائٹس، انٹریکٹو وائس رسپانس، نیپرا کی موبائل اورویب سروسز کی سہولیات حاصل ہیں۔

اجلاس کو بریفنگ میں یہ بھی بتایا گیا کہ بجلی کی ترسیل کے حوالے سے کسی بھی قسم کی شکایات کے حوالے سے ہیلپ لائن 118 کی تمام موبائل فون آپریٹرز سے مفت رسائی یقینی بنائی جا رہی ہے۔ اس مالی سال نومبر تک لیسکو نے 99.2 فیصد، پیسکو نے 99.9 فیصد اور فیسکو نے 99.7 فیصد تک شکایات کیں۔

اجلاس میں وفاقی وزیر اقتصادی امور احد خان چیمہ ، وفاقی وزیر پاور ڈویژن سردار اویس احمد خان لغاری، وزیر مملکت برائے انفارمیشن ٹیکنالوجی و ٹیلی کام شزا فاطمہ، وزیر مملکت برائے خزانہ و محصولات علی پرویز ملک، وزیراعظم کے کوآرڈینیٹر رانا احسان افضل اور متعلقہ اعلیٰ سرکاری افسران نے شرکت کی۔