صوبائی وزیر تعلیم سردار شاہ نے تھرپارکر کے شہر مٹھی میں منعقدہ میگا سائنس فیسٹیول کو علاقے کی تاریخ کا مثالی ایونٹ قرار دیا ہے۔

صوبائی وزیر تعلیم سندھ، سردار شاہ نے میڈیا سے گفتگو کرتے ہوئے کہا کہ سائنس اور آرٹ کے بغیر قوم کی ترقی ممکن نہیں۔

انہوں نے کہا کہ اس فیسٹیول کا مقصد نوجوانوں کو جدید سائنسی رجحانات سے روشناس کرانا اور ان کی خوداعتمادی کو فروغ دینا ہے۔

سردار شاہ نے بتایا کہ تھرپارکر، میرپورخاص اور سندھ کے دیگر چار ڈویژنل ہیڈکوارٹرز میں سائنس میوزیم قائم کیے جا رہے ہیں۔

ان میوزیمز کے ذریعے طلبہ کو عالمی معیار کی سائنسی تعلیم تک رسائی فراہم کی جائے گی۔

فیسٹیول میں تھر فاؤنڈیشن اور دائود فاؤنڈیشن کے اشتراک سے سینکڑوں سائنسی تجربات اور نمائشی اسٹالز کے ذریعے طلبہ کی صلاحیتوں کو اجاگر کیا گیا۔

انہوں نے کہا کہ تھر کے بچوں میں بے پناہ صلاحیت موجود ہے، لیکن مواقع کی کمی ان کے راستے میں رکاوٹ ہے۔

صوبائی وزیر کا کہنا تھا کہ سندھ حکومت اس خلا کو پورا کرنے کے لیے اقدامات کر رہی ہے تاکہ تھر کے باصلاحیت طلبہ کو قومی اور بین الاقوامی سطح پر متعارف کرایا جا سکے۔

صوبائی وزیر نے دریائے سندھ پر کینال کی تعمیر کے منصوبوں کی مخالفت کرتے ہوئے کہا کہ اگر مزید کینال بنائے گئے تو سندھ کی لاکھوں ایکڑ زمین بنجر ہو جائے گی۔

انہوں نے مزید کہا کہ سندھ حکومت اس معاملے کو مشترکہ مفادات کونسل (CCI) میں اٹھا چکی ہے اور آئندہ سندھ اسمبلی اجلاس میں مزید قراردادیں منظور کروائی جائیں گی۔

سردار شاہ نے کہا کہ کارونجھر پہاڑ ہمارے عقیدے، ثقافت، اور بہادری کی علامت ہے۔ سندھ حکومت نے اسے ثقافتی ورثہ قرار دیتے ہوئے اس کی حفاظت کے لیے اقدامات کیے ہیں۔

ان کا کہنا تھا کہ عدالت کے فیصلے کی روشنی میں کارونجھر پہاڑ کی کٹائی کے معاملے پر عمل درآمد کیا جا رہا ہے، اور حکومت مستقبل میں بھی اس کی حفاظت یقینی بنائے گی۔

صوبائی وزیر سردار شاہ نے یقین دلایا کہ تھرپارکر کے بچوں کو ترقی کے مواقع فراہم کیے جائیں گے اور ان کی قابلیت کو دنیا بھر میں اجاگر کیا جائے گا۔

پیپلز پارٹی دریائے سندھ اور دیگر وسائل کی حفاظت کے حوالے سے اپنا واضح مؤقف رکھتی ہے اور اس پر عمل درآمد کو یقینی بنائے گی۔