وزیر اعلیٰ پنجاب، مریم نواز شریف نے پاکستان کا سب سے بڑا صفائی کا منصوبہ “ستھرا پنجاب” لانچ کر دیا ہے جس کا مقصد تین ماہ میں زیرو ویسٹ پنجاب کا ہدف حاصل کرنا ہے۔

 اس موقع پر وزیر اعلیٰ نے ایکسپو سینٹر میں صفائی کے جدید آلات کا معائنہ کیا، جن میں جدید لوڈرز، ٹرک، سپرے مشین، روڈ واشر اور ای بائیک شامل ہیں۔

وزیر اعلیٰ مریم نواز شریف نے سینٹری ورکرز کو سراہا اور ان کے عزم و محنت کی تعریف کی۔ انہوں نے صفائی کے عمل کو مزید بہتر بنانے کے لیے اسٹاف سے بات چیت بھی کی۔

اس موقع پر صوبائی وزیر بلدیات ذیشان رفیق نے “ستھرا پنجاب” منصوبے کی تفصیلات بیان کی۔ انہوں نے کہا کہ پنجاب میں روزانہ 60 ہزار ٹن ویسٹ پیدا ہوتا ہے، لیکن پہلے صرف بیس ہزار ٹن ویسٹ کو ہی اٹھایا جاتا تھا۔

اب لاہور سمیت پورے صوبے میں کوڑا کرکٹ کو فوری طور پر صاف کیا جائے گا۔ اگر کوڑا کرکٹ کی نشاندہی کے بعد چند گھنٹوں میں صفائی نہ ہوئی تو متعلقہ کمپنی کو جرمانہ عائد کیا جائے گا۔

ذیشان رفیق نے مزید بتایا کہ لاہور میں اب کہیں بھی کوڑا کرکٹ نظر نہیں آئے گا، اور اس بات کو یقینی بنایا جائے گا کہ صفائی کا عمل روزانہ کی بنیاد پر مکمل ہو۔ تقریب میں اسپیکر پنجاب اسمبلی، صوبائی وزرا، ارکان اسمبلی اور دیگر اہم شخصیات بھی شریک ہوئیں۔

یہ منصوبہ پنجاب کے شہری علاقوں میں صفائی کے معیار کو بلند کرنے کے ساتھ ساتھ ماحولیاتی آلودگی کو کم کرنے میں مدد فراہم کرے گا، جس سے عوام کی زندگی میں بہتری آئے گی۔