وفاقی وزیر صنعت و پیداوار رانا تنویر حسین نے پاکستان تحریک انصاف (پی ٹی آئی) کی سیاست پر شدید تنقید کرتے ہوئے کہا ہے کہ 26 نومبر کی کال نے پی ٹی آئی کے جنون کو ختم کرکے انہیں “انا للہ وانا الیہ راجعون” کی حالت میں پہنچا دیا ہے۔

اُنہوں نے پی ٹی آئی کی سیاست کو پاکستان کو غیر مستحکم کرنے کا باعث قرار دیتے ہوئے کہا کہ اس سیاست نے عوامی شعور کو بیدار کیا ہے۔

رانا تنویر حسین نے کہا کہ بانی پی ٹی آئی کی پہلی سول نافرمانی کی نسبت دوسری نافرمانی کا حشر کہیں زیادہ بدتر ہوگا۔ اُنہوں نے مزید کہا کہ ہر آنے والا الیکشن پی ٹی آئی سے عوامی نفرت میں اضافہ کر رہا ہے۔

وفاقی وزیر نے پی ٹی آئی کی قیادت کے بارے میں کہا کہ “ڈو آر ڈائی” کے نعرے کے ساتھ اسلام آباد پر چڑھائی کرنے والوں کی حالت قابلِ ترس ہے۔

رانا تنویر حسین نے اس بات کا بھی ذکر کیا کہ پہلے گنڈہ پور اور اب بشریٰ بی بی بھاگ چکی ہیں، اور پی ٹی آئی کا شیرازہ بکھر رہا ہے۔

رانا تنویر حسین نے کہا کہ پی ٹی آئی کا آخری کارڈ کبھی کامیاب نہیں ہوگا، اور پاکستان دشمن ممالک اور عناصر بانی پی ٹی آئی کے حمایت میں اکٹھے ہو چکے ہیں۔

اُنہوں نے یہ بھی کہا کہ اوورسیز پاکستانی پہلے اپنے ملک کے شہری ہیں اور وہ پاکستان کے خلاف کبھی نہیں جا سکتے۔

وفاقی وزیر صنعت و پیداوار رانا تنویر حسین نے حکومت کی کارکردگی پر بھی روشنی ڈالتے ہوئے مزید کہا کہ ہماری حکومت کی 8 ماہ کی کارکردگی نے عوامی رحجان کو تبدیل کر دیا ہے اور اب عوام کا اعتماد ہماری حکومت پر بڑھ رہا ہے۔