کراچی میں بنا لائنسس گاڑی چلانے والوں کے لیے بُری خبر سامنے آ گئی ہے، پولیس نے جنوری سے ان کے خلاف سخت ایکشن لینے کا فیصلہ کر لیا ہے۔

تفصیلات کے مطابق آئی جی سندھ غلام نبی میمن نے سندھ پولیس کی جانب سے ٹریفک قوانین پر آگاہی مہم کا آغاز کرنے کا اعلان کیا۔

کراچی میں پریس کانفرنس کے دوران انہوں نے کہا کہ ڈرائیونگ لائسنس نہ ہونا ٹریفک حادثات کی ایک بڑی وجہ ہے اور اس کے خلاف پولیس بھرپور اقدامات کرے گی۔

آئی جی سندھ نے مزید کہا کہ پولیس افسران کو شہریوں کو تکلیف میں مبتلا کیے بغیر چیکنگ کرنی چاہیے اور لائسنس کی تصدیق سے پہلے انہیں پوچھنا چاہیے کہ ان کے پاس لائسنس ہے یا نہیں۔

انہوں نے واضح کیا کہ پہلی بار چالان کیا جائے گا، جب کہ دوسری بار فوجداری مقدمہ درج کیا جائے گا۔

آئی جی سندھ نے بتایا کہ آگاہی مہم آج سے شروع ہو رہی ہے اور یہ 31 دسمبر تک جاری رہے گی۔ جنوری سے سختی سے عمل درآمد کیا جائے گا۔

ایڈیشنل آئی جی کراچی جاوید عالم اوڈھو نے بھی اپنی پریس بریفنگ میں کراچی کی سڑکوں پر 65 لاکھ گاڑیاں ہونے کا ذکر کیا اور بتایا کہ 75 فیصد موٹر سائیکل سوار چھوٹی عمر کے ہیں۔

انہوں نے کہا کہ آگاہی مہم میں پہلی بار وارننگ دی جائے گی اور بعد میں قانونی کارروائی کی جائے گی۔ اس سال ٹریفک حادثات کے حوالے سے 355 مقدمات درج ہوئے ہیں۔

یہ مہم ٹریفک قوانین کی پابندی اور شہریوں میں آگاہی پیدا کرنے کے لیے شروع کی گئی ہے تاکہ سڑکوں پر حادثات کی شرح میں کمی لائی جا سکے۔