پاکستان نے اقوام متحدہ کی جنرل اسمبلی میں “عوام کے حق خودارادیت کے عالمی ادراک” سے متعلق ایک اہم قرارداد پیش کی، جسے متفقہ طور پر منظور کر لیا گیا۔

ترجمان دفتر خارجہ کے مطابق یہ قرارداد مختلف عالمی خطوں کے متعدد ممالک کی حمایت اور شراکت سے منظور ہوئی، اور اس میں عوام کے حق خودارادیت کو ایک ناقابل تنسیخ حق قرار دیا گیا۔

قرارداد میں خاص طور پر ان عوام کے حق خودارادیت کو اجاگر کیا گیا جو غیر ملکی قبضے، استعماری تسلط، اور غیر ملکی غلبے کا شکار ہیں۔

اس میں اس بات کی توثیق کی گئی کہ حق خودارادیت کی تکمیل انسانی حقوق کے تحفظ اور فروغ کے لیے نہایت ضروری ہے۔

پاکستان گزشتہ چار دہائیوں سے اس قرارداد کو سالانہ بنیادوں پر اقوام متحدہ میں پیش کرتا آیا ہے تاکہ دنیا بھر میں حق خودارادیت سے محروم افراد کی جدوجہد کو اجاگر کیا جا سکے۔

اس قرارداد میں بھارت کے غیر قانونی زیر تسلط جموں و کشمیر اور فلسطین کے عوام کی مشکلات کو بھی نمایاں کیا گیا۔

ترجمان دفتر خارجہ نے اس موقع پر کہا کہ اس قرارداد کی منظوری حق خودارادیت کی جائز خواہشات کے لیے بین الاقوامی حمایت کو مضبوط کرتی ہے، اور اس کی متفقہ طور پر منظوری اقوام متحدہ کے رکن ممالک کی اجتماعی خواہشات کی عکاسی کرتی ہے۔

اس قرارداد نے آزادی اور غیر ملکی قبضے سے نجات کی جدوجہد کرنے والے عوام کے ساتھ یکجہتی کا مضبوط پیغام دیا ہے۔

اس قرارداد میں غیر ملکی مداخلت اور جارحیت کے خاتمے کے مطالبے کے ساتھ عوام کے حقوق کے احترام کی اہمیت کو بھی اجاگر کیا گیا۔

دفتر خارجہ کے ترجمان کا مزید کہنا تھا کہ اس سے یہ ظاہر ہوتا ہے کہ عالمی برادری ان اصولوں کو تسلیم کرتی ہے جو آزادی اور خودمختاری کے حق کے تحفظ کے لیے ضروری ہیں۔