شہر قائد کے علاقے کورنگی ناصرجمپ کے قریب ایک افسوسناک ٹریفک حادثے میں 6 ماہ کا بچہ تیز رفتار ڈمپر کی ٹکر سے جاں بحق ہو گیا۔

ریسکیو ذرائع کے مطابق بچہ اپنی ماں کی گود سے گر کر ڈمپر کے ٹائروں تلے آ گیا۔

حادثہ کی اطلاع ملتے ہی پولیس اور ریسکیو ٹیمیں موقع پر پہنچ گئیں، اور بچے کو فوری طور پر اسپتال منتقل کیا گیا تاہم وہ زخموں کی تاب نہ لاتے ہوئے دم توڑ گیا۔

ڈی آئی جی ٹریفک پولیس احمد نواز چیمہ نے واقعہ کو افسوسناک قرار دیتے ہوئے کہا کہ حادثے کی حتمی وجوہات کی تحقیقات کی جا رہی ہیں اور ڈمپر ڈرائیور کو گرفتار کر لیا گیا ہے۔

انہوں نے مزید کہا کہ ٹریفک قوانین کی خلاف ورزی کے حوالے سے 700 سے زائد ایف آئی آرز درج کی جا چکی ہیں اور غفلت برتنے والے ڈرائیورز کو گرفتار بھی کیا گیا ہے۔

ڈی آئی جی احمد نواز نے بتایا کہ صنعتی ایریا میں ہیوی ٹریفک کو داخل ہونے کی اجازت ہے، تاہم موٹرسائیکل سواروں کی حفاظتی قوانین کی خلاف ورزی پر آگاہی مہم بھی جاری ہے۔

انہوں نے کہا کہ دوران ڈرائیونگ تمام افراد کو ذمہ داری کا مظاہرہ کرنا چاہیے، اور ایسے حادثات میں ملوث ڈرائیورز کے لائسنس منسوخ کر دیے جاتے ہیں۔

انہوں نے اس بات کا بھی عزم ظاہر کیا کہ کیس کو منطقی انجام تک پہنچایا جائے گا تاکہ مستقبل میں اس قسم کے افسوسناک واقعات کی روک تھام کی جا سکے۔