کراچی پولیس چیف جاوید عالم اوڈھو نے ڈی آئی جی ٹریفک کے ہمراہ ایک مشترکہ نیوز کانفرنس میں شہر میں حالیہ ٹریفک حادثات کی بڑھتی ہوئی تعداد پر تشویش کا اظہار کرتے ہوئے حادثات کی روک تھام کے لیے مختلف اقدامات اٹھانے کا اعلان کیا۔

پولیس چیف نے بتایا کہ گزشتہ چند دنوں کے دوران شہر قائد میں کئی ٹریفک حادثات رونما ہوئے ہیں، جس میں شہریوں کی قیمتی جانیں ضائع ہوئیں۔

جاوید عالم اوڈھو نے کہا کہ رواں سال اب تک 479 افراد ٹریفک حادثات میں اپنی جان سے ہاتھ دھو بیٹھے ہیں، اور 345 ایف آئی آر درج کی گئی ہیں۔

انہوں نے مزید کہا کہ پولیس حادثات میں شہریوں کی جانیں بچانے کے لیے اقدامات کر رہی ہے، اور اس مقصد کے لیے روایتی طریقوں سے ہٹ کر کچھ نیا کرنے کی ضرورت ہے، جو کہ حالیہ میٹنگز میں طے پایا ہے۔

پولیس چیف نے کہا کہ ٹریفک حادثات کی روک تھام کے لیے جامع اقدامات اٹھائے جائیں گے۔ انہوں نے خاص طور پر ہیوی ٹریفک، جیسے ڈمپرز، واٹر ٹینکرز اور ٹریلرز کا ذکر کرتے ہوئے کہا کہ ان بڑی گاڑیوں کا عمل دخل 50 فیصد حادثات میں ہوتا ہے۔

انہوں نے کہا کہ ان بڑی گاڑیوں کے قوانین کی خلاف ورزی کرنے والوں کے خلاف چالان بڑھائے جائیں گے۔ جاوید عالم اوڈھو نے تیز گاڑی چلانے والوں کے خلاف مقدمات درج کرنے کا عندیہ بھی دیا۔

انہوں نے مزید کہا کہ موٹرسائیکل سوار زیادہ تر ٹریفک حادثات کا شکار بنتے ہیں، اور ان حادثات کی زد میں 57 فیصد موٹرسائیکل سوار شہری جان سے گئے ہیں۔

کراچی پولیس چیف نے اس بات پر زور دیا کہ ہیلمٹ پہننے کا رجحان بہت کم ہے، اور ہیلمٹ پہن کر حادثات میں جانی نقصان کو کم کیا جا سکتا ہے۔

کراچی پولیس چیف نے اس بات کا بھی انکشاف کیا کہ زیادہ تر ٹریفک حادثات صنعتی علاقوں یا پورٹ کے اطراف میں ہوئے ہیں، جبکہ شہر کے مضافاتی علاقوں میں بھی حادثات کی تعداد زیادہ ہے۔

ان علاقوں میں پولیس کی نفری بڑھانے کا حکم دیا گیا ہے، اور ان حادثات کی روک تھام کے لیے آگاہی مہم شروع کرنے کا ارادہ بھی کیا جا رہا ہے۔

پولیس چیف نے کہا کہ گرفتار ڈرائیورز کو قابل ضمانت سیکشن کے تحت ضمانت نہیں دی جائے گی، تاکہ قانون کی خلاف ورزی کرنے والوں کو سخت سزا مل سکے۔

انہوں نے شہر میں ٹریفک قوانین کی پاسداری کو یقینی بنانے اور شہریوں کی حفاظت کو اولین ترجیح قرار دیا۔