رومانیا کی بحری افواج کے سربراہ وائس ایڈمرل میہائی پنائیت نے حال ہی میں پاکستان نیوی کے جنگی جہاز پی این ایس یمامہ کا دورہ کیا۔

پاک فوج کے شعبہ تعلقات عامہ (آئی ایس پی آر) کے مطابق رومانیا کی بحری افواج کے سربراہ وائس ایڈمرل میہائی پنائیت کو دورے کے دوران جہاز کی آپریشنل صلاحیتوں پر مفصل بریفنگ دی گئی۔

پاکستان نیوی کے سربراہ وائس ایڈمرل محمد فیصل عباسی اور رومانین نیول فورسز کے سربراہ کے درمیان اس ملاقات میں دونوں ممالک کی بحری افواج کے درمیان بڑھتے ہوئے تعاون پر اطمینان کا اظہار کیا گیا۔

آئی ایس پی آر کی جانب سے جاری بیان میں کہا گیا کہ دونوں رہنماؤں نے ملاقات میں دونوں ممالک کی بحری افواج کے تعلقات کو مزید مستحکم کرنے کے عزم کا اعادہ کیا۔

 اس ملاقات کے دوران دونوں جانب سے مشترکہ بحری آپریشنز اور تربیت کے شعبوں میں تعاون کی مزید تقویت پر زور دیا گیا۔

اس سے قبل 17 دسمبر کو پی این ایس یمامہ نے رومانیہ کے بحری جہاز کے ساتھ بحری مشق بھی کی تھی۔ اس مشق کا مقصد دونوں افواج کی مشترکہ آپریشنز کی صلاحیت کو فروغ دینا تھا۔

پی این ایس یمامہ پاکستان نیوی کے چار جہازوں میں سے آخری جہاز ہے جو ڈیمین شپ یارڈز میں تعمیر کیا گیا۔

آئی ایس پی آر کا مزید کہنا تھا کہ اس سے پہلے پاک بحریہ نے تین آف شور پٹرول ویسلز، پی این ایس تبوک، پی این ایس یرموک اور پی این ایس حنین کو اپنے بیڑے میں شامل کیا ہے۔