وزیر اعلیٰ ترجمان کے مطابق وزیر اعلیٰ سندھ مراد علی شاہ نے اچانک سیف سیٹی آفس ڈی ایچ اے کا دورہ کیا۔

ترجمان کے مطابق اس دورے میں وزیر داخلہ ضیاء الحسن لنجار بھی وزیر اعلیٰ کے ہمراہ تھے، مراد علی شاہ نے ایمرجنسی ریسپانس وہیکلز کا جائزہ لیا۔

ڈی جی  سیف سٹی  اعجاز شیخ نے وزیراعلیٰ سندھ کو ایمرجنسی ریسپانس  وہیکلز  کے فیچر ز  کے حوالے سے بریفنگ دی۔

بریفنگ میں اعجاز شیخ نے وزیر اعلیٰ کو بتایا کہ ایمرجنسی  ریسپانس  وہیکلز آرٹیفشل  انٹیلی جنس (اے آئی)  کے فیچرز  سے لیس ہیں، ای آر وی  میں چہرے اور گاڑیوں کے نمبر پلیٹس  کی شناخت کے فیچرز بھی موجود ہیں۔

بریفنگ میں بتایا گیا کہ پورا سیف سٹی  نادرا  اور ایکسائز  کے سسٹم سے منسلک ہورہا ہے۔

وزیر اعلیٰ سندھ نے ڈی جی سیف سٹی کو ہدایت کی کہ ایمرجنسی  ریسپانس  وہیکلز  کو نادرا  اور ایکسائز  اینڈ ٹیکسیشن  کے سسٹم  سے بھی منسلک کریں۔

وزیراعلیٰ سندھ نے سیف سٹی  اتھارٹی کو 23  ای آر وی  کراچی  کی سڑکوں   پر لانے کی ہدایت کی۔

وزیر اعلیٰ سندھ کا کہنا تھا کہ پہلے مرحلے میں پانچ اور اگلے دو مہینوں  میں باقی وہیکلز  بھی کراچی کی سڑکوں پر  ہونی چاہئیں

وزیراعلیٰ سندھ مراد علی شاہ نے سیف سٹی  اتھارٹی  کو کراچی میں بھرپور  کام کرنے کی ہدایت کی اور کہا کہ کراچی میں 2025 تک سیف سٹی پروجیکٹ کو مکمل کیا جائے۔