سوار محمد حسین شہید نشان حیدر کا 53 واں یوم شہادت آج بھرپور عقیدت و احترام کے ساتھ منایا جا رہا ہے۔

پاک فوج کے شعبہ تعلقات عامہ (آئی ایس پی آر) چیئرمین جوائنٹ چیفس آف اسٹاف کمیٹی، تینوں سروسز چیف اور افواج پاکستان نے سوار محمد حسین شہید کو ان کی قربانی اور بہادری کے لیے خراج عقیدت پیش کیا۔

سوار محمد حسین شہید نے 1971 کی پاک بھارت جنگ کے دوران شجاعت کی ایک نئی تاریخ رقم کی۔

شکرگڑھ سیکٹر کے علاقے ظفروال میں دشمن کے درجنوں ٹینکوں کو تباہ کرنے کے دوران سوار محمد حسین شہید نے اپنی حکمت عملی اور بے مثال جرات سے دشمن کی صفوں میں خوف پیدا کیا۔

آئی ایس پی آر کا کہنا تھا کہ سوار محمد حسین شہید نے دشمن کے ٹینکوں کی نشاندہی کر کے اپنی ٹیم کو ہدایات دیں، جس کے نتیجے میں 16 ٹینک تباہ ہوئے۔

اسی دوران دشمن کی مشین گن کی گولی سوار محمد حسین کے سینے پر لگی، مگر وہ اپنی جان کی پرواہ کیے بغیر میدان میں ڈٹے رہے اور ملک کی حرمت کے لیے اپنی جان قربان کر دی۔

آئی ایس پی آر کا مزید کہنا تھا کہ سوار محمد حسین شہید کی بہادری اور قوم سے وفاداری ہمیشہ قوم کے دلوں میں زندہ رہے گی۔ پوری قوم اپنے بہادر سپوتوں کو سلام پیش کرتی ہے جنہوں نے پاکستان کے دفاع کے لیے اپنی جانیں نچھاور کیں۔