وزیراعلیٰ سندھ مراد علی شاہ نے عالمی یوم ایڈز کے موقع پر اپنے پیغام میں کہا کہ ایڈز کے بارے میں آگاہی پیدا کرنا اور اس بیماری کی روک تھام کے لئے تمام افراد کا کردار انتہائی اہم ہے۔

انہوں نے عالمی تھیم ’’درست سمت کا انتخاب، میری صحت میرا حق‘‘ کو زبان زدِ عام کرنے کی ضرورت پر زور دیا۔

مراد علی شاہ نے کہا کہ ایڈز کی بیماری کا بڑھتا ہوا رجحان معاشرتی طور پر تکلیف دہ ہے، اور اس کے خلاف جنگ میں ہر فرد کی ذمہ داری ہے۔ صحت مند معاشرہ ہر فرد کے لئے ضروری ہے، اور اس مقصد کو حاصل کرنے کے لئے معلوماتی مہمات چلانا ضروری ہیں تاکہ لوگوں کو اس بیماری کے حوالے سے آگاہی فراہم کی جا سکے۔

وزیراعلیٰ سندھ نے اس بات پر زور دیا کہ سندھ حکومت نے ایڈز کے تدارک کے لیے متعدد اقدامات کیے ہیں، جن میں علاج، دیکھ بھال اور بہتر سپورٹ کے ذریعے لوگوں کو محفوظ بنانا شامل ہے۔

انہوں نے کہا کہ ہم سب کی مشترکہ کوششوں سے ہی اس بیماری کی روک تھام ممکن ہے اور لوگوں کو اس کے اثرات سے بچایا جا سکتا ہے۔

مراد علی شاہ نے مزید کہا کہ صحت کا خیال رکھنا اور اس مرض کے حوالے سے آگاہی فراہم کرنا ہمارا اجتماعی فرض ہے۔ صحت مند معاشرہ ہی ملک کی ترقی کی بنیاد ہے اور اس کے لیے ہمیں ایک ساتھ مل کر کام کرنے کی ضرورت ہے۔

وزیراعلیٰ سندھ نے اس دن کے موقع پر تمام افراد سے اپیل کی کہ وہ ایڈز کے بارے میں آگاہی پھیلائیں اور اس بیماری کی روک تھام میں اپنا حصہ ڈالیں۔