سکھ رہنما اور سکھ فار جسٹس کے جنرل کونسلر گرپتونت سنگھ پنوں نے امریکی نائب صدر  سے بھارت کے دورے میں بی جے پی کے ایک سینئر کارکن کی جانب سے ان کے قتل پر انعام رکھنے کے معاملے کو اٹھانے کی درخواست کی ہے۔

انہوں نے امریکی نائب صدر کو ایک خط ارسال کیا، جس میں انہوں نے کہا کہ وہ ایک امریکی شہری، انسانی حقوق کے وکیل اور سکھ فار جسٹس کے نمائندہ کی حیثیت سے یہ خط لکھ رہے ہیں۔

گرپتونت سنگھ پنوں نے خط میں یہ الزام عائد کیا کہ بی جے پی کے ایک سینئر کارکن نے ان کے قتل پر 2 لاکھ 50 ہزار ڈالر کا انعام رکھا ہے۔

انہوں نے کہا کہ یہ اعلان امریکی سرزمین پر ایک امریکی شہری کے قتل کا مجرمانہ عمل ہے اور اس کا اثر نہ صرف امریکی خودمختاری بلکہ قومی سلامتی پر بھی پڑ رہا ہے۔

انہوں نے مزید کہا کہ یہ قتل کی دھمکی ایک ریاستی زیر سرپرستی بین الاقوامی جبر کا حصہ ہے، اور میں نائب صدر سے درخواست کرتا ہوں کہ وہ بھارت کے دورے کے دوران اس معاملے کو اٹھائیں اور بھارتی حکومت کو اس کے ممکنہ اثرات سے خبردار کریں۔

گرپتونت سنگھ پنوں نے خط میں یہ بھی کہا کہ امریکی نائب صدر بھارت کو قانونی کارروائی، اقتصادی پابندیوں کے حوالے سے خبردار کریں اور اس معاملے میں ملوث بھارتی اداروں کو غیر ملکی دہشت گرد تنظیموں کے طور پر نامزد کریں۔

انہوں نے کہا کہ مجھے یقین ہے کہ اقتصادی یا سفارتی تحفظات سے قطع نظر، خالصتان ریفرنڈم کے منتظمین کی آئینی آزادی اور تحفظ کو برقرار رکھا جائے گا۔