پاکستان اور بھارت کے درمیان پہلگام واقعے کے بعد جاری کشیدگی نے سرمایہ کاروں کے اعتماد کو بری طرح مجروح کیا ہے، جس کے منفی اثرات پاکستان اسٹاک ایکچینج پر مرتب ہونا شروع ہو گئے ہیں، بدھ کو پاکستان اسٹاک ایکسچینج میں بڑی گراوٹ دیکھی گئی ہے۔

بدھ کو کاروباری دن کے آغاز پر ہی اسٹاک مارکیٹ میں بڑی گراوٹ دیکھی گئی، ایک موقع پر مارکیٹ 4240 پوائنٹس تک گرگئی، تاہم کاروباری دن کے اختتام تک 695 پوائنٹس کی ریکوری ہوئی  اور یوں 3545 پوائنٹس کی کمی کے ساتھ پاکستان اسٹاک مارکیٹ 1 لاکھ 11 ہزار 326 پوائنٹس پر بند ہوئی ہے۔

وفاقی وزیر اطلاعات عطااللہ تارڑ نے رات گئے ویڈو بیان میں کہا تھا کہ قابل اعتماد انٹیلی جنس رپورٹس سے ظاہر ہوتا ہے کہ بھارت گزشتہ ہفتے مقبوضہ کشمیر میں پہلگام حملے کے بعد دونوں ممالک کے درمیان کشیدگی کے بعد اگلے 24 سے 36 گھنٹوں میں پاکستان کے خلاف فوجی کارروائی کرنے کی منصوبہ بندی کر رہا ہے۔

منگل کو بھارت نے پہلگام حملے کا جواب دینے کے لیے اپنی فوج کو آپریشنل آزادی دی تھی، اس پیش رفت کے کچھ گھنٹوں بعد میڈیا سے بات کرتے ہوئے عطا اللہ تارڑ نے کہا کہ پاکستان کے پاس قابل اعتماد انٹیلی جنس ہے کہ ہندوستان اگلے 24 سے 36 گھنٹوں میں پہلگام واقعے میں ملوث ہونے کے بے بنیاد اور من گھڑت الزامات کے بہانے پاکستان کے خلاف فوجی کارروائی کرنے کا ارادہ رکھتا ہے۔

ان کا کہنا تھا کہ پاکستان، بھارت کا خطے میں مدعی، منصف اور جلاد کا خود ساختہ کردار سختی سے مسترد کرتا ہے۔