معروف امریکی اخبار نیو یارک ٹائمز نے بھارت کے پہلگام حملے سے متعلق فالس فلیگ آپریشن کا بھانڈا پھوڑ دیا ہے، جس میں انکشاف کیا گیا ہے کہ بھارت بظاہر پاکستان کے خلاف فوجی کارروائی کا جواز پیدا کرنے کی کوشش کر رہا ہے، لیکن بھارت کے پاس پاکستان کے خلاف کوئی ثبوت موجود نہیں ہیں۔

غیر ملکی اخبار نے اپنی رپورٹ میں لکھا ہے کہ بھارت نے پہلگام واقعے کے فوراً بعد پاکستان پر الزام عائد کردیا لیکن غیر ملکی سفارت کاروں کے مطابق بھارت اس الزام کے حق میں کوئی ٹھوس شواہد پیش نہیں کرسکا۔

رپورٹ کے مطابق بھارت نے تقریباً 100 غیر ملکی سفارت کاروں کو وزارت خارجہ بلا کر ایک بریفنگ دی جس میں حملے سے متعلق ڈیٹا اور مبینہ انٹیلی جنس معلومات فراہم کی گئیں۔ تاہم، بریفنگ میں شریک سفارت کاروں اور تجزیہ کاروں کا کہنا تھا کہ بھارت کوئی قابلِ اعتماد ثبوت مہیا نہ کرسکا جو پاکستان کی مداخلت کی تصدیق کرے۔

نیو یارک ٹائمز کا سفارتکاروں کے حوالے سے کہنا ہے کہ نئی دہلی اندرونی خلفشار اور سیاسی دباؤ سے عالمی توجہ ہٹانے کے لیے جنگی جنون کو ہوا دے رہا ہے۔ رپورٹ کے مطابق، نریندر مودی حکومت نے درجنوں عالمی رہنماؤں سے رابطہ کر کے پاکستان پر دہشت گردوں کی پشت پناہی کا الزام لگاتے ہوئے مدد مانگی، تاہم عالمی برادری نے ثبوت کی عدم موجودگی میں احتیاط برتی ہے۔

بھارتی تجزیہ کاروں کا کہنا ہے کہ بھارت کو کسی بھی فوجی اقدام سے قبل مکمل شواہد اکٹھے کرنے کی ضرورت ہے۔ اس کے برعکس، مودی حکومت نے سندھ طاس معاہدے کو معطل کرتے ہوئے پاکستان سے سفارتی تعلقات محدود کر دیے اور پاکستانی سفارت کاروں کو ملک بدر کرنے کے ساتھ ساتھ ویزے منسوخ کر دیے۔

مزید برآں، رپورٹ میں بتایا گیا ہے کہ بھارت میں کشمیری طلبہ کو ہراساں کیا جا رہا ہے، مسلم مخالف جذبات میں شدت آئی ہے اور مقبوضہ کشمیر میں انسانی حقوق کی سنگین خلاف ورزیاں جاری ہیں۔

22 اپریل کو پہلگام میں پیش آنے والے حملے کے فوراً بعد بھارت نے بغیر تحقیق پاکستان پر الزام عائد کیا تھا۔ سندھ طاس معاہدہ معطل کرنے کا اعلان کرتے ہوئے تمام سفارتی تعلقات منقطع کر دیے تھے۔ اس کے جواب میں پاکستان کی قومی سلامتی کمیٹی نے پانی روکنے کو جنگ کے مترادف قرار دیتے ہوئے سخت جوابی ردعمل کا عندیہ دیا تھا۔