بھارتی خفیہ ایجنسی ریسرچ اینڈ اینالیسز ونگ (RAW) کا پاکستان کے خلاف ایک اور مذموم منصوبہ دنیا کے سامنے آ گیا ہے۔

سوشل میڈیا پلیٹ فارم ٹیلیگرام پر موجود چینل “TRF J&K” نے بھارت کی انتہائی خفیہ سرکاری دستاویزات لیک کر دی ہیں، جن میں پاکستان کے خلاف منظم سازش کی تفصیلات سامنے آئی ہیں۔

دستاویز کے مطابق یہ منصوبہ بندی 16 اپریل 2025 کو کی گئی تھی، جس کے تحت 22 اپریل کو مقبوضہ کشمیر کے علاقے پہلگام میں دہشت گرد حملے کا ڈرامہ رچانے کا فیصلہ کیا گیا۔

اس جعلی حملے کے ذریعے بھارت کی خفیہ ایجنسی را نے پاکستان کو عالمی سطح پر بدنام کرنے، سفارتی تنہائی کا شکار کرنے اور داخلی سکیورٹی کو سبوتاژ کرنے کا منصوبہ تیار کیا۔

لیک شدہ دستاویز میں انکشاف کیا گیا ہے کہ حملے میں مقبوضہ کشمیر کے شہریوں کو نشانہ بنانے کی منصوبہ بندی کی گئی تاکہ عالمی میڈیا میں خبر کو زیادہ کوریج ملے۔

حملے کی ذمہ داری کشمیری مزاحمتی گروپوں جیسے “دی رزسٹنٹ فرنٹ” اور “اینٹی فاشسٹ فرنٹ” پر ڈالنے کی ہدایت دی گئی، جبکہ جعلی فارنزک شواہد کے ذریعے پاکستان کی خفیہ ایجنسی آئی ایس آئی اور ملٹری انٹیلیجنس کو ملوث ظاہر کرنے کا ارادہ ظاہر کیا گیا۔

دستاویز میں واضح طور پر بتایا گیا ہے کہ یہ منصوبہ بھارت کے گلوبل کاؤنٹر ٹیررازم کمپیکٹ میں گرتے ہوئے امیج کو بہتر بنانے اور بین الاقوامی سطح پر اپنی پوزیشن مضبوط کرنے کی ایک کوشش ہے۔

اس کے ساتھ ساتھ، حملے کے بعد آزاد کشمیر میں محدود فوجی کارروائی کا بھی عندیہ دیا گیا ہے، جس کا مقصد پاکستان کی توجہ مشرقی سرحد پر مرکوز کر کے بلوچستان اور وزیرستان میں تخریب کاری کو بڑھاوا دینا ہے۔

مزید برآں، بھارتی خفیہ ایجنسی نے بلوچ نیشنلسٹ آرمی اور بلوچ لبریشن آرمی جیسے گروپوں کو استعمال کرتے ہوئے پاکستانی سکیورٹی فورسز اور اہم انفراسٹرکچر کو نشانہ بنانے کی بھی منصوبہ بندی کی ہے۔

اسی دستاویز میں یہ انکشاف بھی کیا گیا ہے کہ بھارت اس واقعے کو جواز بنا کر سندھ طاس معاہدے کو ختم کرنے کا اعلان کرے گا، جس سے پاکستان کی زراعت اور معیشت کو شدید نقصان پہنچانے کا خطرہ موجود ہے۔

اس سازش کو تقویت دینے کے لیے مصنوعی ذہانت (AI) کے ذریعے جعلی ویڈیوز اور دستاویزات تیار کرنے کی منصوبہ بندی بھی کی گئی ہے۔

اگر پاکستان کسی جوابی اقدام کے تحت 1.3 کلومیٹر سے زیادہ علاقہ عبور کرے، تو بھارت کو فوراً پیچھے ہٹنے اور عالمی دباؤ سے بچنے کے لیے کارروائی کو 150 گھنٹوں تک محدود رکھنے کی ہدایت دی گئی ہے۔