نیویارک: امریکی صدر ڈونلڈ ٹرمپ نے نیویارک میں تعینات امریکی فوجیوں سے خطاب کرتے ہوئے کہا ہے کہ امریکہ کی فوج دنیا کی سب سے بڑی اور طاقتور فورس ہے۔

امریکی صدر نے کہا کہ ان کی حکومت اسے مزید منظم اور جدید ترین ہتھیاروں سے لیس کرنے کے لیے پرعزم ہے۔

صدر ٹرمپ نے اپنے خطاب میں امریکہ کی عسکری تاریخ اور حالیہ کامیابیوں کو سراہتے ہوئے کہا کہ امریکی فوج نے دہشت گرد تنظیم داعش کو شکست دی اور دنیا بھر میں ہونے والی جنگوں میں نمایاں کامیابیاں حاصل کیں۔

انہوں نے کہا کہ امریکہ نے نہ صرف پہلی بلکہ دوسری عالمی جنگ بھی جیتی، جو اس کی عسکری صلاحیتوں اور قومی عزم کا ثبوت ہے۔

ٹرمپ نے کہا کہ ان کا مشن امریکہ کا سنہری دور واپس لانا ہے اور اس مقصد کے لیے مضبوط معیشت اور طاقتور دفاعی نظام ناگزیر ہیں۔

مزید پڑھیں: ڈونلڈ ٹرمپ نے پاکستان پر بھارت کے بزدلانہ حملے کوانتہائی شرمناک قراردیدیا

انہوں نے قطر، سعودی عرب اور متحدہ عرب امارات کے حالیہ دورے کو شاندار قرار دیا اور کہا کہ ان ممالک کے رہنماؤں سے بہترین ملاقاتیں ہوئیں، جو مستقبل میں بہتر تعلقات کی بنیاد ثابت ہوں گی۔

صدر ٹرمپ نے اپنے خطاب میں شکایت کی کہ امریکہ کو ماضی میں کئی ممالک کی جانب سے تجارتی استحصال کا سامنا رہا ہے۔ انہوں نے واضح کیا کہ نیٹو کے تحت اب امریکہ کا مزید استحصال برداشت نہیں کیا جائے گا۔

انہوں نے خبردار کیا کہ اگر امریکہ کے کسی اتحادی ملک پر حملہ ہوا تو امریکی فوج پوری طاقت کے ساتھ کارروائی کرے گی۔

صدر ٹرمپ نے کہا کہ ان کی انتظامیہ چین اور روس کے ساتھ بہتر تعلقات کی خواہاں ہے، اور اس مقصد کے لیے مذاکرات اور باہمی احترام کو فروغ دیا جائے گا۔