پاکستان کرکٹ بورڈ ( پی سی بی) نے بھارتی جارحیت کے باجود پی ایس ایل کے میچز کو جاری رکھنے کا فیصلہ کیا ہے، پی سی بی کے مطابق اسلام آباد یونائیٹڈ اور کوئٹہ گلیڈی ایٹرز کا میچ آج شیڈول کے مطابق راولپنڈی میں ہوگا۔

پاکستان کرکٹ بورڈ (پی سی بی) نے اعلان کیا ہے کہ حالیہ حالات کے باوجود پاکستان سپر لیگ (پی ایس ایل) 10 کے تمام میچز شیڈول کے مطابق منعقد ہوں گے۔

پی سی بی کے جاری کردہ اعلامیے کے مطابق، اسلام آباد یونائیٹڈ اور کوئٹہ گلیڈی ایٹرز کے درمیان میچ آج راولپنڈی میں طے شدہ وقت پر کھیلا جائے گا۔ میچ کا ٹاس شام 7:30 بجے جبکہ آغاز 8:00 بجے ہوگا۔

پی سی بی نے واضح کیا کہ پی ایس ایل 10 کے بقیہ میچز میں بھی کسی قسم کی تبدیلی نہیں کی گئی۔

گزشتہ رات بھارتی فوج نے بزدلانہ کارروائی کرتے ہوئے آزاد کشمیر کے علاقے کوٹلی، مظفر آباد، باغ کے علاوہ پنجاب کے مریدکے اور احمد پور شرقیہ میں شہری آبادی کو نشانہ بنایا۔ اس حملے میں 2 مساجد شہید ہوئیں، جبکہ دو بچوں سمیت 26 پاکستانی شہری شہید اور 46 زخمی ہوئے۔

پاک فوج نے بھارتی جارحیت کا بھرپور جواب دیتے ہوئے بھارتی فضائیہ کے 3 رافیل، ایک سکوئی، ایک مگ 29 اور ایک ڈرون کو تباہ کر دیا۔ اس کے علاوہ، بھارتی فوج کا بریگیڈ ہیڈ کوارٹر بھی تباہ کردیا۔

پاک فوج کی مؤثر کارروائی کے بعد بھارتی فوج نے لائن آف کنٹرول (LOC) پر سفید جھنڈا لہرا کر شکست تسلیم کر لی۔