چیف آف آرمی اسٹاف (سی او اے ایس) جنرل سید عاصم منیر، نشانِ امتیاز (ملٹری) نے آج کمبائنڈ ملٹری اسپتال (سی ایم ایچ) راولپنڈی کا دورہ کیا۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف کا یہ دورہ آپریشن ” بُنْيَانٌ مَّرْصُوْصٌ/ معرکۂ حق” کے دوران زخمی ہونے والے پاک فوج کے بہادر جوانوں اور معصوم شہریوں کی خیریت دریافت کرنے کے لیے کیا گیا۔

آئی ایس پی آر کے مطابق، آرمی چیف نے زخمی اہلکاروں سے انفرادی طور پر ملاقات کی، ان کی غیر معمولی جرأت، استقامت اور فرض شناسی کو سراہا، اور ان کی جلد صحت یابی کے لیے نیک تمناؤں کا اظہار کیا۔

جنرل عاصم منیز نے اس موقع پر کہا کہ ہمارے شہریوں اور سپاہیوں کی جرأت اور قربانی پاکستان کی سلامتی کی بنیاد ہے۔ پوری قوم اپنی مسلح افواج کے ہر فرد کے ساتھ مکمل یکجہتی کے ساتھ کھڑی ہے۔

انہوں نے اس بات پر زور دیا کہ کوئی بھی دشمن، چاہے اندرونی ہو یا بیرونی، پاکستان کی مسلح افواج کے عزم و استقلال کو متزلزل نہیں کر سکتا۔

سی او اے ایس نے کہا کہ آپریشن ” بُنْيَانٌ مَّرْصُوْصٌ/ معرکۂ حق” کے دوران افواجِ پاکستان کے جری، مربوط اور متحد ردعمل نے عسکری تاریخ میں ایک روشن باب رقم کیا ہے، جب کہ عوام کی پائیدار حمایت نے قومی اتحاد و یکجہتی کو مزید مستحکم کیا۔

آئی ایس پی آر کا مزید کہنا تھا کہ آرمی چیف جنرل سید عاصم منیر، نشانِ امتیاز (ملٹری)  نے فوجی جوانوں کی فلاح و بہبود، طبی سہولیات اور بحالی کے لیے تمام ممکنہ اقدامات جاری رکھنے کے عزم کا اعادہ کیا۔