سندھ کے متعدد شہروں میں درجہ حرارت 45 ڈگری سینٹی گریڈ تک پہنچ چکا ہے، جبکہ ساحلی شہر ہونے کی وجہ سے کراچی میں دیگر شہروں کی نسبت موسم کم گرم ہے۔

محکمہ موسمیات نے آج بھی شہر کا موسم گرم اور مرطوب رہنے کا امکان ظاہر کیا ہے۔

آج کراچی میں میں کم سے کم درجہ حرارت 27 ڈگری سینٹی گریڈ ریکارڈ کیا گیاہے، جبکہ زیادہ سے زیادہ درجہ حرارت  37 ڈگری سینٹی گریڈ ریکارڈ ہونے کا امکان ظاہر کیا گیا ہے۔

کراچی میں ہوا میں نمی کا تناسب  79 فیصد ریکارڈ کیا گیا ہے، ہوا میں نمی کا تناسب زیادہ ہونے کی وجہ سے گرمی کی شدت 2 تا 4 ڈگری زیادہ محسوس کی جائے گی۔

اس وقت شہر کا درجہ حرارت 32 ڈگری سینٹی گریڈ ہے جبکہ گرمی کی شدت 35 ڈگری سینٹی گریڈ تک محسوس کی جارہی ہے۔

شہر میں 15 کلو میٹر فی گھنٹہ کی رفتار سے جنوب مغربی ہوا چل رہی ہے، محکمہ موسمیات کے مطابق آج شہر کا مطلع صاف رہے گا، اور بارش کا کوئی امکان نہیں ہے۔

محکمہ موسمیات کے مطابق حیدرآباد میں درجہ حرارت زیادہ سے زیادہ 42 ڈگری رہنے کا امکان ہے، لیکن گرمی کی شدت 47 ڈگری تک محسوس ہوگی۔

حیدرآباد میں ہوا میں نمی کا تناسب 60 فیصد ہے، جبکہ ہوائیں 16 کلو میٹر فی گھنٹہ کی رفتار سے رہی ہیں۔

سندھ میں سب سے زیادہ گرمی خیرپور میں ریکارڈ کی جارہی ہے، جہاں محکمہ موسمیات نے درجہ حرارت 45 سینٹی گریڈ تک پہنچنے کا امکان ظاہر کیا ہے۔

محکمہ موسمیات کے مطابق خيرپور کے علاقے کوٹ ڈیجی اور نارا چونکہ پہاڑی علاقے ہیں، اس لیے بھی یہاں شدید گرمی رکارڈ ہوتی ہے۔

سکھر شہر اور گردونواح کے علاقوں میں بھی شدید گرمی کی لہر جاری ہے، سکھر میں درجہ حرارت کے 45 سے 47 سینٹی گریڈ تک جانے کا امکان محکمہ موسمیات کی جانب سے ظاہر کیا گیا ہے۔

روہڑی، پنوعاقل، صالح پٹ سمیت سکھر کے تمام علاقوں میں دن بھر لُو کے تھپیڑے چل رہے ہیں،  اور شدید گرمی کا راج برقرار ہے۔

سندھ کے ساحلی علاقوں کے علاوہ پورا صوبہ ہیٹ ویو کی لپیٹ میں ہے، ملک بھر میں جاری اس ہیٹ ویو کا سلسلہ 20 مئی تک جاری رہے گا۔

یہ بھی پڑھیں: موسمیاتی تبدیلیوں کے باعث پاکستان کا موسم تیزی سے تبدیل ہو رہا ہے

ہیٹ ویو کے پیش نظر ماہرین نے شہریوں سے اپیل کی ہے کہ شہری غیرضروری طور پر گھروں سے باہر نہ نکلیں، اگر باہر نکلنا ضروری ہو تو باہر نکلنے کی صورت چھاؤں یا سائے سے گزریں۔

ایک جانب سورج آگ برسا رہا ہے تو دوسری جانب لوڈشیڈنگ نے شہریوں کی زندگی کو اجیرن کردیا ہے، کئی کئی گھنٹوں کی اعلانیہ اور غیر اعلانیہ لوڈ شیڈنگ کسی بھی وقت بڑے بحران کا سبب بن سکتی ہے۔

شہریوں نے حکومت سے مطالبہ کیا ہے کہ حکومت سخت گرمی کے اس موسم میں بجلی کی بلاتعطل فراہمی کو ممکن بنائے۔