امریکی اخبار کا کہنا ہے کہ اسرائیل غزہ پر وحشیانہ حملوں کے نتیجے میں عالمی برادری میں تنہائی کا سامنا کر رہا ہے۔

معروف امریکی اخبار نے اپنی تازہ رپورٹ میں کہا ہے کہ اسرائیلی افواج کی جانب سے غزہ میں جاری شدید حملوں، امدادی سرگرمیوں میں بدنظمی اور نہتے فلسطینیوں پر فائرنگ جیسے واقعات کے بعد اسرائیل بین الاقوامی سطح پر شدید تنقید اور عالمی تنہائی کا سامنا کر رہا ہے۔

رپورٹ کے مطابق، غزہ میں امداد کی تقسیم، جو امریکی سرپرستی میں کی جا رہی ہے، شدید بدنظمی کا شکار ہے۔ صورتحال اس قدر خراب ہو چکی ہے کہ اسرائیلی فوج نے خوراک اور پانی کے منتظر بھوک و پیاس سے نڈھال فلسطینی شہریوں پر فائرنگ کر دی، جس کے نتیجے میں متعدد افراد شہید ہو گئے۔

مزید پڑھیں: پاکستان بھارت کو بھاری نقصان پہنچانے کی صلاحیت رکھتا ہے، امریکی اخبار

اسرائیل کی جانب سے غزہ پر جاری جارحیت کو 17 ماہ سے زائد کا عرصہ گزر چکا ہے، اور مقامی و بین الاقوامی ذرائع کے مطابق شہدا کی تعداد 54 ہزار سے تجاوز کر چکی ہے۔

دوسری جانب اسرائیل کی مسلسل بمباری سے پیدا ہونے والی خوراک اور طبی سہولیات کی شدید قلت نے انسانی بحران کو خوفناک حد تک بڑھا دیا ہے۔

حالیہ دنوں میں حماس نے امریکا کی جانب سے پیش کردہ جنگ بندی تجاویز پر آمادگی ظاہر کی ہے، لیکن اسرائیل نے ایک بار پھر ان تجاویز کو مسترد کر دیا ہے، جس سے جنگ بندی کے امکانات مزید کمزور ہو گئے ہیں۔

امریکی اخبار کے مطابق، اسرائیل کی موجودہ پالیسیوں اور غزہ میں وحشیانہ کارروائیوں کے باعث اسے عالمی سطح پر تنہائی کا سامنا ہے۔ متعدد ممالک اور انسانی حقوق کی تنظیموں نے اسرائیلی اقدامات کو غیر انسانی اور بین الاقوامی قوانین کے منافی قرار دیا ہے۔