بھارت کے بزدلانہ حملے کے بعد پاک فوج کی جانب سے بھارتی فوج کو منہ توڑ جواب دینے کا سلسلہ جاری ہے، پاک فوج کے جوانوں نے لائن آف کنٹرول پر بھارتی فوج کی مزید 3 پوسٹیں تباہ کردی ہیں۔

سیکیورٹی ذرائع کا کہنا ہے کہ لائن آف کنٹرول پر پاک فوج کی جانب سے بھارتی فوج کیخلاف بھرپور جوابی کارروائیاں جاری ہیں، بھارتی جارحیت کا جواب پاک فوج بھرپور طریقے سے دے رہی ہے۔

سکیورٹی ذرائع کے مطابق تازہ کارروائی میں مندل سیکٹر میں سری ٹاپ پر بھارتی پوسٹ کو پاک فوج نے تباہ کر ڈالا ہے، پاک فوج کی گولہ باری کے بعد بھارتی پوسٹ دھویں کی لپیٹ میں آگئی ہے۔

سکیورٹی ذرائع کے مطابق دوسری کارروائی میں پاک فوج نے چری کوٹ کے بلمقابل  جبڑی پوسٹ کو بھی تباہ کردیا ہے، پاک فوج کی گولہ باری سے پوری پوسٹ آگ کی لپیٹ میں آگئی، جس کے بعد بھارتی فوج بھاگنے پر مجبور ہوگئی۔

جاری کی گئی فوٹیج میں پوسٹ کے تباہ ہونے کے بعد دھواں نکلنے کے مناظر بھی بخوبی دیکھے جا سکتے ہیں، پونچھ سیکٹر میں ہیڈ کوارٹر 93 بریگیڈ کی تباہی کی فوٹیج بھی دیکھی جاسکتی ہیں۔

یاد رہے کہ اس سے قبل 12 بریگیڈ اڑی سیکٹر میں بھی بھارتی فوج کو منہ کی کھانی پڑی،  بھارتی جارحیت کا جواب پاک فوج بھرپور طریقے سے دے رہی ہے، پاکستان  کی مسلح افواج کی کارروائیوں سے  بھارتی فوج کے قدم اکھڑ چکے ہیں۔