سعودی عرب میں معروف ایرانی عالم دین غلام رضا قاسمیان کو سعودی حکومت کے خلاف مبینہ تنقیدی سوشل میڈیا پوسٹ پر گرفتار کر لیا گیا ہے۔

بین الاقوامی خبر رساں اداروں کے مطابق، غلام رضا قاسمیان فریضہ حج کی ادائیگی کے لیے سعودی عرب میں موجود تھے، جب حکام نے انہیں حراست میں لیا۔ سعودی حکام کی جانب سے تاحال گرفتاری کی وجوہات یا الزامات کی تفصیل جاری نہیں کی گئی۔

ادھر ایرانی عدلیہ نے اس اقدام کو “غیر منصفانہ اور غیر قانونی” قرار دیتے ہوئے فوری رہائی کا مطالبہ کیا ہے۔ ایرانی حکام کا کہنا ہے کہ ایک مذہبی شخصیت کو صرف رائے کے اظہار پر گرفتار کرنا قابل مذمت ہے اور اس سے دونوں ممالک کے درمیان تعلقات متاثر ہو سکتے ہیں۔

مزید پڑھیں: نو سال بعد پہلا ایرانی گروپ عمرہ ادائیگی کیلئے سعودی عرب روانہ

ایران کے وزیر خارجہ عباس عراقچی نے واقعے پر ردعمل دیتے ہوئے کہا ہے کہ ہم حج جیسے مقدس موقع پر اس قسم کی کارروائیوں کی شدید مذمت کرتے ہیں۔ مسلم اُمہ کے اتحاد کو نقصان پہنچانے کی کسی بھی کوشش کو ہرگز برداشت نہیں کیا جائے گا۔ ہم سعودی عرب کے ساتھ تعلقات کو سبوتاژ کرنے کی اجازت نہیں دیں گے۔

واضح رہے کہ حالیہ مہینوں میں ایران اور سعودی عرب کے تعلقات میں بہتری آئی تھی، تاہم اس واقعے سے خطے میں ایک بار پھر سفارتی کشیدگی پیدا ہونے کا خدشہ پیدا ہو گیا ہے۔

سعودی وزارت اطلاعات کی جانب سے تاحال اس واقعے پر کوئی سرکاری بیان سامنے نہیں آیا۔