آذربائیجان کے صدر الہام علیوف نے پاکستان کے ساتھ اپنے ملک کی مکمل یکجہتی کا اعادہ کرتے ہوئے کہا کہ مسئلہ کشمیر کا حل اقوام متحدہ کی قراردادوں میں موجود ہے۔

انہوں نے کہا کہ پاکستان، ترکیہ اور آذربائیجان کے درمیان مشترکہ تاریخ اور ثقافت ہے، اور یہ تینوں ممالک دفاع، سیاحت، اور سرمایہ کاری کے شعبوں میں ایک دوسرے کے ساتھ مل کر آگے بڑھنے کے لیے پُرعزم ہیں۔

الہام علیوف کا کہنا تھا کہ 2020 میں آذربائیجان کی جنگ کے دوران پاکستان اور ترکیہ نے ان کی بھرپور مدد کی، اور آج تینوں ممالک مشترکہ اہداف کے حصول کے لیے مل کر کام کر رہے ہیں۔

صدر علیوف نے اس بات کا بھی اعلان کیا کہ آذربائیجان پاکستان میں 2 ارب ڈالر کی سرمایہ کاری کرے گا، اور دونوں ممالک اس سرمایہ کاری کے منصوبوں کا جائزہ لے رہے ہیں۔

آذربائیجان کے صدر نے مزید کہا کہ پاکستان اور ترکیہ کے ساتھ آذربائیجان کا دفاعی شعبے میں تعاون علاقائی استحکام کے لیے انتہائی اہمیت کا حامل ہے۔ تینوں ملک دفاعی شعبے میں مزید شراکت داری کو فروغ دینے کے لیے ایک دوسرے کے ساتھ مل کر کام کر رہے ہیں۔

الہام علیوف نے کہا کہ ان کے ملک کو پاکستان اور ترکیہ کے ساتھ سیاحت کے شعبے میں بھی کام کرنے کی خواہش ہے، اور انہوں نے یہ بھی کہا کہ او آئی سی اور اقوام متحدہ جیسے عالمی فورمز پر تینوں ممالک کا موقف یکساں ہے۔

آذربائیجان کے صدر نے پاکستان اور بھارت کے درمیان حالیہ کشیدگی پر تشویش کا اظہار کرتے ہوئے کہا کہ آذربائیجان نے ہمیشہ اپنے بردار ممالک پاکستان اور ترکیہ کا ساتھ دیا ہے اور ان کے تعلقات کو مزید مضبوط بنانے کے لیے ہر ممکن تعاون فراہم کیا ہے۔

رجب طیب اردوان کا پیغام

ترکیہ کے صدر رجب طیب اردوان نے آذربائیجان کے یوم آزادی پر خوشی کا اظہار کرتے ہوئے کہا کہ ان کا یقین ہے کہ آذربائیجان کے آزاد ہونے والے علاقوں میں ترقی اور خوشحالی کا نیا دور شروع ہوگا۔

اردوان نے تینوں ممالک کے تعلقات کو باہمی احترام اور اعتماد پر مبنی قرار دیا اور کہا کہ یہ دوسرا سہ فریقی اجلاس ہے، جس کا مقصد اسٹریٹجک شراکت داری کو مزید مستحکم کرنا ہے۔