کراچی کے طبی ماہرین نے شہریوں کو خبردار کیا ہے کہ اپنی زندگی کو پُراسرار بیماری سے بچانے کے لیے احتیاط کریں۔

طبی ماہرین کے مطابق شہر قائد میں کبوتروں سے پھیلنے والی خطرناک پھیپھڑوں کی بیماری برڈ فینسرز لنگ (Bird Fancier’s Lung) یا ہائپر سینسٹیویٹی نمونائٹس کے کیسز میں تیزی سے اضافہ ہو رہا ہے، جس سے زیادہ تر خواتین متاثر ہو رہی ہیں۔

معروف اور بڑے نجی اسپتال کے مطابق، ہر ہفتے 15 سے 20 مریض اس بیماری کے ساتھ رپورٹ ہو رہے ہیں۔

ماہر امراض پھیپھڑا و سینہ، ڈاکٹر محمد عرفان کے مطابق، کبوتر کے پروں اور فضلے کے باریک ذرات سانس کی نالی میں جمع ہو کر الرجی، سوجن اور شدید سانس کی تکلیف کا باعث بن رہے ہیں۔

ڈاکٹر عرفان کا کہنا ہے کہ یہ ذرات کھڑکیوں اور ایئرکنڈیشنرز کے ذریعے گھروں میں داخل ہو کر حساس افراد کے لیے خطرہ بن جاتے ہیں، اور شدید صورتوں میں مریضوں کو اسٹیرائڈز، آکسیجن تھراپی حتیٰ کہ پھیپھڑوں کی پیوند کاری کی ضرورت پیش آ سکتی ہے۔

ماہرین نے شہریوں سے اپیل کی ہے کہ کبوتروں کے قریب نہ جائیں اور گھروں کے اندر صفائی اور فلٹریشن کے نظام کو بہتر بنائیں۔

ڈاکٹر عرفان نے واضح کیا کہ آسٹریلیا، سوئٹزرلینڈ جیسے ممالک میں کبوتروں کو رہائشی علاقوں میں دانہ ڈالنے پر پابندی ہے تاکہ شہری صحت محفوظ رہے۔