بھارت کی جانب سے بڑھتی ہوئی جارحیت نے پی ایس ایل کے بقیہ میچز کا انعقاد خطرے میں ڈال دیا ہے، ماہرین پی ایس ایل کے بقایا میچز کو کراچی منتقل کرنے پر زور دے رہے ہیں۔

ذرائع کا کہنا ہے کہ ملکی ایئراسپیس بند ہونے اور سیکیورٹی صورتحال کے باعث پیچیدہ صورتحال درپیش ہے، جس کی وجہ سے میچز کے ملتوی ہونے کے خدشات بڑھ رہے ہیں۔

ذرائع کے مطابق پی سی بی حکام نے اس حوالے سے منعقدہ اجلاس میں بقیہ میچز کراچی منتقل کرنے کی تجویز دی ہے، تاہم اس تجویز پر حتمی فیصلہ آج شام تک کیا جائے گا۔

یاد رہے کہ بھارتی فوج نے رات کی تاریکی میں بزدلانہ حملہ کرتے ہوئے آزاد کشمیر کے علاقوں کوٹلی، مظفر آباد اور باغ کے علاوہ مریدکے اور احمد پور شرقیہ میں شہری آبادی کو نشانہ بنایا جس میں 2 مساجد شہید ہوئیں جبکہ دو بچوں سمیت 26 پاکستانی شہید اور 46 زخمی ہوئے۔

پاک فوج نے بھارتی بزدلانہ کارروائیوں کا بھرپور جواب دیتے ہوئے بھارتی فوج کے 3 رافیل، ایک سکوئی، ایک مگ 29 اور ایک ڈرون تباہ کر دیا جبکہ بھارتی فوج کا بریگیڈ ہیڈ کوارٹر بھی تباہ کر دیا۔

پاک فوج کے بھرپور اور تابڑ توڑ حملے کے بعد بھارت نے لائن آف کنٹرول پر سفید جھنڈا لہرا کر شکست تسلیم کر لی۔ لیکن بعد ازاں بھارتی فوج کی جانب سے جارحیت کا سلسلہ دوبارہ شروع کر دیا گیا ہے، جس کے بعد سیکیورٹی صورتحال پیچیدہ ہوتی جارہی ہے۔