پاکستان سپر لیگ ( پی ایس ایل) کے 10 ویں سیزن کے نئے شیڈول کا اعلان کیے جانے کے بعد غیر ملکی کھلاڑیوں کی جانب سے ٹورنامنٹ کے لیے اپنی دستیابی ظاہر کیے جانے کا سلسلہ جاری ہے۔

تازہ ترین اطلاعات کے مطابق جنوبی افریقہ کے کھلاڑی راسی وین ڈر ڈوسن اور انگلینڈ کے کھلاڑی ایلکس ہیلز نے پی ایس ایل جوائن کرنے کے لیے اپنی دستیابی کا اظہار کردیا ہے۔

دونوں بیٹسمین اسلام آباد یونائیٹڈ کا حصہ ہیں، اور جلد اپنی ٹیموں کو جوائن کرنے کے لیے پاکستان پہنچے گے۔

ترجمان اسلام آباد یونائیٹڈ کا کہنا ہےکہ ہم بہت پرجوش ہیں کہ راسی وین ڈر ڈیوسن ٹیم کو جوائن کررہے ہیں، مینجمنٹ دونوں کھلاڑیوں کو پی ایس ایل میں خوش آمدید کہتی ہے۔

سوشل میڈیا پر جاری بیان میں الیکس ہیلز کا کہنا تھا کہ ذاتی مصروفیات کی وجہ سے پی ایس ایل کے ابتدائی میچز میں شرکت نہیں کرسکا تھا لیکن بقیہ میچز کے لیے پاکستان آؤں گا۔

اس سے قبل، ڈیوڈ وارنر ، بین میک ڈرموٹ، جیمز ونس، سکندر رضا، لیوک ووڈ ، ٹام کوہلر کیڈ مور، میکس برائنٹ، نجیب اللہ زدران، کوشل مینڈس بھی پی ایس ایل کے بقیہ میچز کے لیے پاکستان آنے کی ہامی بھرچکے ہیں۔

دوسری جانب، پاکستان سپر لیگ کے بقیہ میچز کے ٹکٹوں کی فروخت شروع ہوگئی ہے، ٹکٹس نجی کوریئر کمپنی کی ویب سائٹ اور سینٹرز سے خریدے جاسکتے ہیں۔

راولپنڈی میں شیڈول میچز کے ٹکٹوں کی قیمتیں 650 روپے سے 3 ہزار روپے تک رکھی گئی ہیں جب کہ کوالیفائر، ایلیمینیٹرز کے ٹکٹوں کی قیمتیں ایک ہزار روپے سے 6 ہزار 500 روپے تک رکھی گئی ہیں اور فائنل کے ٹکٹ کی کم سے کم قیمت 1500 روپے اور زیادہ سے زیادہ 10ہزار روپے ہوگی۔