اسلام آباد میں طوفانی بارش کے بعد انتظامیہ نے اپنی کمر کس لی ہے اور تمام اداروں کو فیلڈ میں متحرک کر دیا ہے۔

اسلام آباد میں طوفانی بارش کے پیش نظر چیئرمین کیپیٹل ڈیولپمنٹ اتھارٹی (سی ڈی اے) و چیف کمشنر اسلام آباد محمد علی رندھاوا کی ہدایت پر سی ڈی اے، میونسپل کارپوریشن اسلام آباد (ایم سی آئی) اور ضلعی انتظامیہ کی مشترکہ ٹیمیں فیلڈ میں متحرک ہو گئیں۔

چیئرمین سی ڈی اے و چیف کمشنر اسلام آباد محمد علی رندھاوا خود فیلڈ آپریشن کی نگرانی کر رہے ہیں، جبکہ نکاسی آب اور صفائی ستھرائی کے اقدامات کو یقینی بنانے کے لیے اے ڈی سی جی، اسسٹنٹ کمشنرز، سی ڈی اے، ایم سی آئی اور ریسکیو 1122 کی ٹیمیں آپریشن میں بھرپور حصہ لے رہی ہیں۔

اسلام آباد کی تمام اہم شاہراہوں پر صفائی کے عمل کا آغاز کر دیا گیا ہے تاکہ ٹریفک کی روانی برقرار رکھی جا سکے۔

محمد علی رندھاوا کا کہنا ہے کہ نالوں، انڈرپاسز، نشیبی علاقوں اور پانی کی گزرگاہوں کی سخت نگرانی کی جا رہی ہے، اور وہاں نکاسی آب کا عمل مکمل طور پر فعال ہے۔

سی ڈی اے انتظامیہ کے مطابق نالوں میں پانی کے بہاؤ میں کسی قسم کی رکاوٹ نہیں، جبکہ شہر کے نشیبی علاقوں میں بھی مسلسل مانیٹرنگ جاری ہے۔

تمام فیلڈ افسران کو ہدایت کی گئی ہے کہ وہ موقع پر موجود رہ کر صورتحال کا جائزہ لیں اور کسی بھی ممکنہ ہنگامی صورتحال سے فوری نمٹنے کے لیے تیار رہیں۔

شہریوں سے اپیل کی گئی ہے کہ کسی بھی ہنگامی صورتحال یا شکایت کی صورت میں سی ڈی اے کی ہیلپ لائن پر فوری رابطہ کریں۔ موصول ہونے والی تمام شکایات کا بروقت ازالہ کیا جا رہا ہے۔