کیابھارت جنگی جنون میں پھر سے کوئی حماقت کرنے جارہا ہے ؟عالمی جریدے نے خدشہ ظاہر کیاہے کہ ٹرمپ کے دورہ امریکا کے بعدبھارت سیز فائر معاہدے سے صاف مکر سکتاہے۔

امریکی صدرڈونلڈ ٹرمپ کا حالیہ دورہ مشرق وسطیٰ بظاہراسرائیل اورعرب دنیا کے درمیان تعلقات میں بہتری لانے کی کوشش تھی تاہم اس دورے کے اثرات صرف مشرق وسطیٰ تک محدود نہیں رہے۔

عالمی جریدے نے اپنی رپورٹ میں بتایاکہ ٹرمپ انتظامیہ نے مشرق وسطیٰ آمدسے قبل اس بات کو یقینی بنایاکہ دورے سے قبل پاک بھارت کشیدگی کوکم کیا جائے یا اسے وقتی یاکل وقتی طورپر روکاجائے۔

امریکی صدرٹرمپ نے سعودی عرب پہنچ کر بھی پاکستان بھارت کے درمیان سیزفائر کا کریڈٹ امریکا کو دیتے ہوئے امید ظاہر کی دونوں ممالک سیز فائر پر قائم رہیں گے۔

رپورٹ میں بتایا گیاکہ بظاہر سیز فائر تو ہوچکا ہے اور دونوں ممالک  کے ڈی جی ایم اوز کے درمیان پہلا باضابطہ رابطہ بھی ہواہے مگر کشیدہ صورتحال اب بھی موجودہے۔

بھارت کی جانب سے مسلسل دراندازی کے الزامات لگائے جارہے ہیں  جبکہ پاکستان کی واضح طور پر سختی سے  تردید کررہاہے۔

رپورٹ کے مطابق بعض عالمی ماہرین نے  امریکی صدرٹرمپ کے دورہ مشرق وسطیٰ  کے بعد پاک بھارت حالات پھر سے کشیدہ ہوجانے کاخدشہ ظاہر کیاہے ۔

بعض ماہرین کا یہ کہناہے کہ اس فی الوقتی سیز فائر کا ممکنہ مقصد یہ بھی ہوسکتاہے کہ بھارت کو اپنے نقصانات سے سنبھلنے کا موقع مل جائے ۔

سیز فائر معاہدہ توڑنا آسان نہ ہوگا،بھارت مزیدسفارتی تنہائی کاشکارہوجائےگا،عالمی ماہرین

غیرجانبدار ماہرین کا کہناہے کہ حالات کودیکھتے ہوئے یہ قیاس کیاجاسکتاہے کہ بھارت دوبارہ سے  اپنی صف بندی کررہاہو اورٹرمپ کادورہ امریکاختم ہوتے ہی دوباہ  سے کشیدگی کوہوا دینا شروع کردے۔

ایک برطانوی دفاعی تجزیہ کار نے کہاہے کہ پاکستان نے چین کی ٹیکنالوجی کے ذریعے بھارت کواس کی توقع سے بڑھ کر سرپرائزدیا ہے اور بھاری نقصان پہنچایاہے۔

ایک اور غیر ملکی رپورٹ میں کہاگیاہے کہ بھارت کےلئے اب سیز فائر معاہدہ ختم کرنا ایک حماقت ہوگی یہ آسان نہیں ہوگا اس طرح اسے مزید سفارتی تنہائی کا سامنا کرناپڑسکتاہے۔

رپورٹ میں کہا گیا اس بار کوئی بھی یک طرفہ جارحیت خطے کو کسی بھی بڑی جنگ کی طرف دھکیل سکتی ہے ، پاکستان نے اپنی دفاعی صلاحیت کے استعمال سے عالمی طاقتوں کو حیران کردیاہے۔

بھارت حماقت کی غلطی نہیں کرے گا! پاکستانی دفاعی ماہرین کی رائے

پاکستانی ماہرین کا موجودہ صورتحال میں کہناہے کہ پاکستان افواج مکمل چوکس ہے بھارت کی حالیہ بزدلانہ کارروائی کو دیکھتے ہوئے پاکستان کسی خوش فہمی میں نہیں بلکہ پہلے سے زیادہ مستعد ہے۔

ماہرین نے خبردار کیاہے کہ بھارت نے اب کی بارجنگی جنون میں کوئی بھی حماقت کی تو اس کو پہلے سے کہیں زیادہ نقصان اٹھاناپڑ سکتاہے، سندھ طاس معاہدہ کی خلاف ورزی کشیدگی کو مزید بڑھا سکتی ہے۔