پاکستان کی جانب سے بھارتی رافیل لڑاکا طیارہ مار گرائے جانے کے دعوے کی تصدیق فرانسیسی انٹیلی جنس ذرائع نے کر دی ہے۔

معروف بین الاقوامی نشریاتی ادارے سی این این کے مطابق، فرانسیسی انٹیلی جنس اہلکار نے تصدیق کی ہے کہ پاکستان نے کم از کم ایک رافیل طیارہ فضا میں مار گرایا ہے، اور یہ اپنی نوعیت کا پہلا واقعہ ہے۔

ذرائع کا کہنا ہے کہ اس کارروائی میں چین ساختہ J-10C لڑاکا طیارے نے اہم کردار ادا کیا، جس نے پہلی بار دورانِ جنگ کسی دشمن طیارے کو مار گرایا۔

رپورٹ کے مطابق، یہ بھی پہلی بار ہے کہ پی ایل-15 میزائل کا عملی جنگ میں مؤثر استعمال کرتے ہوئے کسی لڑاکا طیارے کو نشانہ بنایا گیا۔

مزید پڑھیں: پاک فضائیہ نے بھارتی تکبر خاک میں ملا دیا، اسحاق ڈار

فرانسیسی حکام پاکستان کے ان دعووں کا بھی جائزہ لے رہے ہیں جن میں مزید دو رافیل طیارے مار گرائے جانے کی اطلاعات شامل ہیں۔

سی این این کے مطابق، فرانسیسی دفاعی ادارے اس نقصان کا تفصیلی تکنیکی و عملیاتی تجزیہ کر رہے ہیں۔

رافیل طیارہ فرانسیسی کمپنی ڈاسو ایوی ایشن کا تیار کردہ ہے، جو 4.5 جنریشن کے ٹوئن انجن، کثیر المقاصد لڑاکا طیاروں میں شمار ہوتا ہے۔

اس کا وزن 10 ٹن تک ہوتا ہے اور یہ طیارہ 30 ملی میٹر کینن کے ساتھ ساتھ فضا سے فضا میں مار کرنے والے جدید میزائل، لیزر گائیڈڈ بموں اور کروز میزائلوں سے لیس ہوتا ہے۔

بھارت نے فرانس سے 36 رافیل طیارے خریدنے کا معاہدہ کیا تھا جنہیں جدید ترین ٹیکنالوجی کے تحت بھارتی فضائیہ میں شامل کیا گیا۔