صدرِ مملکت آصف علی زرداری اور وزیراعظم شہباز شریف کے درمیان ایوانِ صدر میں اہم ملاقات ہوئی، جس میں قومی سلامتی، خطے کی صورتحال اور بھارت کی جانب سے بڑھتے ہوئے اشتعال انگیز بیانات پر تفصیلی تبادلہ خیال کیا گیا۔

سرکاری اعلامیہ کے مطابق، ملاقات میں نائب وزیراعظم اسحاق ڈار اور وزیر قانون اعظم نذیر تارڑ بھی شریک تھے۔

اس اعلیٰ سطحی مشاورت میں پہلگام واقعے کے پس منظر میں بھارت کی ممکنہ جارحیت اور اس کے ردعمل کے لیے پاکستان کی حکمت عملی کا جائزہ لیا گیا۔

اعلامیے میں کہا گیا کہ صدر اور وزیراعظم نے بھارت کے جارحانہ رویے اور اشتعال انگیز بیانات پر گہری تشویش کا اظہار کرتے ہوئے واضح کیا کہ پاکستان اپنی علاقائی سالمیت اور خودمختاری پر کسی صورت سمجھوتہ نہیں کرے گا۔

اعلامیے میں کہا گیا کہ افواجِ پاکستان کو اپنی سرزمین کے دفاع کی مکمل صلاحیت حاصل ہے اور وہ کسی بھی قسم کی جارحیت کا منہ توڑ جواب دینے کے لیے پوری طرح تیار ہیں۔

مزید کہا گیا کہ پاکستانی قوم متحد ہے اور ہر مشکل گھڑی میں اپنی مسلح افواج کے شانہ بشانہ کھڑی ہے۔

 بھارتی رویے کو خطے کے امن و استحکام کے لیے خطرہ قرار دیتے ہوئے اعلامیے میں کہا گیا کہ پاکستان امن کا خواہاں ضرور ہے لیکن کسی بھی جارحانہ اقدام کا بھرپور جواب دیا جائے گا۔