چیئرمین پاکستان پیپلزپارٹی بلاول بھٹو زرداری نے کہا ہے کہ اگر بھارت نے دریاؤں کا پانی روکا تو دشمن کا خون بہے گا۔

میرپورخاص میں عوامی جلسے سے خطاب کرتے ہوئے بلاول بھٹو نے کہا کہ اگر کوئی دریائے سندھ پر حملہ کرے گا تو وہ جنگ کی تیاری کرے، ہم امن چاہتے ہیں مگر قومی وسائل کے تحفظ پر کوئی سمجھوتہ نہیں ہوگا۔۔

بلاول بھٹو نے جلسے کی ابتداء میں قومی پرچم لہرایا اور کہا کہ آج ایک بار پھر میرپورخاص کی عوام کے جوش و خروش نے ثابت کر دیا ہے کہ سندھ کا ووٹ صرف “تیر” کا ہے۔

انہوں نے کہا کہ الیکشن میں پیپلزپارٹی کو دھاندلی سے ہرانے کی کوشش کی گئی، لیکن عوام نے تمام سازشیں ناکام بنا دیں۔

انہوں نے سابق صدر آصف علی زرداری کی قیادت میں کیے گئے فیصلوں کا حوالہ دیتے ہوئے کہا کہ پیپلزپارٹی نے مشترکہ مفادات کونسل (سی سی آئی) میں طے کیا کہ دریائے سندھ پر نئی نہریں نہیں بننے دیں گے۔

ان کا کہنا تھا کہ اگر نئی نہریں بنائی جاتیں تو سندھ اور جنوبی پنجاب کے کسانوں کا معاشی قتل ہو جاتا۔

بلاول بھٹو نے بھارت کے وزیراعظم نریندر مودی پر شدید تنقید کرتے ہوئے کہا کہ ’’گجرات کا قصائی‘‘ اب سندھ پر حملے کی سازش کر رہا ہے۔

ان کا کہنا تھا کہ ہم جنگ نہیں چاہتے لیکن اگر ہم پر جنگ مسلط کی گئی تو ہر حملے کا منہ توڑ جواب دیں گے۔

انہوں نے عالمی برادری کو خبردار کرتے ہوئے کہا کہ پاکستان ایک پُرامن ملک ہے اور اسلام امن کا دین ہے، لیکن اگر سندھ طاس معاہدے کو چیلنج کیا گیا تو پورے خطے کا امن خطرے میں پڑ جائے گا۔

بلاول بھٹو نے اپنی تقریر میں اس عزم کا اظہار کیا کہ پیپلزپارٹی کسانوں کی ترقی کے لیے تین مرحلوں پر مشتمل زرعی اصلاحات لائے گی، جس میں چھوٹے کسانوں کے لیے جدید ٹیکنالوجی کی فراہمی اور ان کا اتحاد شامل ہوگا۔

اختتام پر چیئرمین پیپلزپارٹی نے کہا کہ ہم نے دو آمروں کو گرا دیا، اب ان انتہاپسندوں اور دشمن عناصر کو بھی بے نقاب کریں گے۔