پاکستان اور بھارت کے درمیان جاری کشیدہ صورتحال نے آئی پی ایل کو بھی متاثر کردیا ہے، دونوں ممالک کی افواج کے درمیان گزشتہ روز سے جاری جھڑپوں کے بعد بھارت نے آئی پی ایل کو معطل کرنے کا فیصلہ کرلیا ہے۔

بھارتی میڈیا کے مطابق کشیدگی میں اضافے کے بعد بھارتی بورڈ اور آئی پی ایل منیجمنٹ کا ہنگامی اجلاس ہوا، جس میں آئی پی ایل کو غیر معینہ مدت تک کے لیے معطل کرنے کا فیصلہ کیا گیا ہے۔

اس حوالے سے مزید تفصیلات جلد بھارتی بورڈ کی جانب سے جاری کر دی جائے گی۔

گزشتہ روز بھی آئی پی ایل کا دھرم شالہ میں کھیلا جانے والا میچ روک دیا گیا تھا اور اسٹیڈیم کی لائٹس بند کر دی گئی تھی جبکہ غیر ملکی کھلاڑیوں نے آئی پی ایل چھوڑ کر اپنے وطن جانے کے لیے پروازوں کی دستیابی دیکھنا شروع کر دی تھی۔

یاد رہے کہ بھارت کی جانب سے پاکستان پر کیے جانے والے حملے کے بعد پاکستان کی جانب سے دشمن کو منہ توڑ جواب دیا جا رہا ہے اور پاکستان کی سیاسی اور عسکری قیادت نے دو ٹوک اعلان کیا ہے کہ پاکستان اقوام متحدہ کے قوانین کے مطابق حملے کا جواب دینے کا پورا حق رکھتا ہے۔

وفاقی وزیر اطلاعات عطا تارڑ کا کہنا ہے کہ ہم بھارت کو جواب دیں گے اور جلد دیں گے، بھارت کو ایسا جواب دیں گے دنیا یاد رکھے گی۔

وزیر دفاع خواجہ آصف نے کہا کہ بھارتی ڈرون حملوں کے بعد پاکستان کا جواب دینا یقینی ہے۔