پرتگال کے اسٹار فٹبالر کرسٹیانو رونالڈو نے سعودی کلب النصر سے اپنی علیحدگی کا اعلان ایک مبہم سوشل میڈیا پوسٹ کے ذریعے کیا ہے۔

رونالڈو نے لکھا: “یہ باب ختم ہوگیا! کہانی؟ ابھی تک لکھی جا رہی ہے، میں اس سفر میں سب کا مشکور ہوں۔”

یہ پیغام سعودی پرو لیگ کے اختتام کے بعد، 26 مئی 2025 کو الفتح کے خلاف 3-2 سے شکست کے باوجود ایک گول اسکور کرنے کے بعد شیئر کیا گیا۔

رونالڈو نے 105 میچز میں 93 گول اسکور کیے، اور 2023 میں عرب کلب چیمپئنز کپ جیتا، لیکن سعودی پرو لیگ کا ٹائٹل حاصل نہیں کر سکے۔

ان کی موجودہ معاہدہ جون 2025 میں ختم ہو رہا ہے، اور فیفا کے صدر جیانی انفانٹینو کے مطابق، رونالڈو مختلف کلبوں کے ساتھ مذاکرات کر رہے ہیں جو 14 جون سے امریکا میں شروع ہونے والے فیفا کلب ورلڈکپ میں حصہ لیں گے۔

مزید پڑھیں: کرسٹیانو رونالڈو سمیت سعودی پرو لیگ کے ستاروں کی موج مستیاں

رپورٹس کے مطابق، رونالڈو ممکنہ طور پر برازیل کے کلبوں جیسے پالمیراس، فلامینگو، فلومیننس، یا بوٹافوگو میں شامل ہو سکتے ہیں، اور ممکنہ طور پر انٹر میامی کے لائونل میسی کے ساتھ بھی کھیل سکتے ہیں ۔

رونالڈو نے حالیہ دنوں میں فیفا کلب ورلڈکپ میں شرکت کے لیے نئے کلب میں شامل ہونے کی خواہش ظاہر کی ہے، اور پرتگال کی نیشنز لیگ کے فائنل فور میں جرمنی کے خلاف میچ پر بھی توجہ مرکوز کر رہے ہیں ۔

اگرچہ رونالڈو نے اپنی النصر سے علیحدگی کا اعلان کیا ہے، لیکن ان کا مستقبل ابھی تک واضح نہیں ہے، اور مداح ان کے اگلے قدم کا انتظار کر رہے ہیں۔