جنوبی افریقہ کے متعدد شہروں میں برف باری کا سلسلہ دوسرے روز بھی جاری ہے، جس کے باعث سردی کی شدت میں نمایاں اضافہ ہو گیا ہے۔

ایسٹرن کیپ، بارکلی، فری اسٹیٹ اور دیگر علاقوں میں زمین، پہاڑ، سڑکیں اور گاڑیاں مکمل طور پر برف سے ڈھک گئی ہیں، جبکہ معمولات زندگی متاثر ہو کر رہ گئے ہیں۔

محکمہ موسمیات اور ایمرجنسی ادارے صورتحال پر گہری نظر رکھے ہوئے ہیں۔ اب تک کسی جانی یا مالی نقصان کی اطلاع موصول نہیں ہوئی، تاہم شہریوں کو غیر ضروری سفر سے گریز کی ہدایت کی گئی ہے۔

حکام کے مطابق لوٹس برگ کے مقام پر این-9 شاہراہ کو شدید برف باری اور پھسلن کے باعث بند کر دیا گیا ہے، جہاں ڈرائیونگ کو انتہائی خطرناک قرار دیا گیا ہے۔

تیز ہوتی برف باری کے پیش نظر مڈبرگ اور گراف رینٹ کے درمیان لوٹس برگ کا علاقہ باضابطہ طور پر سیل کر دیا گیا ہے، اور داخلہ و خارجی راستے بند کر دیے گئے ہیں۔ ٹریفک حکام نے متبادل راستوں کے استعمال کی ہدایت کی ہے تاکہ شہریوں کی حفاظت یقینی بنائی جا سکے۔

محکمہ موسمیات کے مطابق برف باری کا سلسلہ آئندہ ہفتے تک جاری رہنے کا امکان ہے، جس کے باعث مزید سردی بڑھے گی۔

 شہریوں کو سختی سے ہدایت کی گئی ہے کہ وہ جاری کردہ موسمی ایڈوائزری اور حفاظتی تدابیر پر مکمل عمل کریں۔ تمام مانیٹرنگ ادارے مسلسل متحرک ہیں اور صورتِ حال کو قابو میں رکھنے کے لیے کام کر رہے ہیں۔