اسلام آباد میں 17 سالہ ٹک ٹاکر ثنا یوسف کو قتل کرنے والے ملزم کو پولیس نے گرفتار کرلیا ہے۔

پولیس کا کہنا ہے کہ 17 سالہ ٹک ٹاکر ثنا یوسف کو قتل کرنے والے ملزم کو گرفتار کرلیا  گیا ہے، ملزم کے قبضے سے پستول اور ثنا یوسف کا موبائل فون بھی برآمد کیا گیا ہے۔

گزشتہ روز نامعلوم شخس نے ثنا یوسف کو اسلام آباد کے علاقے جی-13 میں واقع ان کے گھر میں گولی مار کر قتل کر دیا تھا، پولیس کے مطابق، ملزم گھر میں داخل ہو کر سیدھا ثنا یوسف کے کمرے میں گیا اور اس پر فائرنگ کی۔

مزید پڑھیں: اسلام آباد میں ٹک ٹاکر ثنا یوسف کو قتل کردیا گیا

پولیس نے مقتولہ کے کال ریکارڈز کا جائزہ لیا، جس میں ایک مشتبہ نمبر کی پروفائل پر موجود تصویر ملزم سے ملتی تھی، اس کے بعد، پولیس نے ملزم کو گرفتار کیا اور اس سے ثنا یوسف کا موبائل فون اور پستول برآمد کیا۔

ثنا یوسف کا تعلق خیبرپختونخوا کے ضلع چترال سے تھا اور وہ اسلام آباد میں اپنے اہل خانہ کے ساتھ رہائش پذیر تھیں۔ ان کے ٹک ٹاک اکاؤنٹ پر تقریباً 81 ہزار فالوورز تھے اور وہ اپنی ویڈیوز میں اسلام آباد کے مختلف مقامات پر گھومتی اور کھانے سے لطف اندوز ہوتی نظر آتی تھیں۔

مقتولہ کی والدہ نے ایف آئی آر میں بتایا کہ ایک شخص اچانک ان کے گھر میں داخل ہوا اور اس نے ان کی بیٹی پر سیدھے فائر کیے، جن میں سے دو ان کے سینے پر لگے۔