آج صبح اسرائیلی حملوں کے بعد ایران نے اپنی عسکری قیادت میں نمایاں تبدیلیاں کرتے ہوئے نئی کمان متعارف کرا دی ہے۔ ان تبدیلیوں کو ایران کی دفاعی حکمتِ عملی کے ازسرِ نو تعین اور جوابی اقدامات کا حصہ قرار دیا جا رہا ہے۔

ایرانی سرکاری خبر رساں ادارے مہر نیوز کے مطابق سپریم لیڈر آیت اللہ سید علی خامنہ ای نے میجر جنرل عبدالرحیم موسوی کو مسلح افواج کا نیا چیف آف اسٹاف مقرر کر دیا ہے۔

موسوی اس سے قبل ایرانی فوج کے سربراہ کی حیثیت سے خدمات انجام دے چکے ہیں اور انہیں ملک کو درپیش حساس سیکیورٹی حالات میں اہم ذمہ داری سونپی گئی ہے۔

مزید پڑھیں: اسرائیل کا ایران کی فوجی و ایٹمی تنصیبات پر بڑا حملہ، پاسداران انقلاب کے سربراہ اور آرمی چیف سمیت 6 سائنسدان شہید

اسی حکم نامے کے تحت، بریگیڈیئر جنرل محمد پاکپور کو پاسداران انقلاب اسلامی (IRGC) کا نیا سربراہ تعینات کیا گیا ہے۔ وہ اس سے قبل IRGC کی زمینی فورسز کی کمان سنبھال رہے تھے، اور ان کے عسکری تجربے کو موجودہ صورتحال میں نہایت اہم قرار دیا جا رہا ہے۔

ادھر، خاتم‌الانبیاﷺ سینٹرل ہیڈکوارٹرز کی کمان بھی تبدیل کر دی گئی ہے۔ میجر جنرل غلام علی راشد کی شہادت کے بعد بریگیڈیئر جنرل علی شادمانی کو میجر جنرل کے عہدے پر ترقی دے کر اس کلیدی عسکری مرکز کا نیا کمانڈر مقرر کیا گیا ہے۔

یہ تقرریاں اسرائیلی حملوں کے بعد کی گئی ہیں، جن میں ایران کے متعدد حساس جوہری و عسکری مراکز کو نشانہ بنایا گیا اور کئی اعلیٰ فوجی افسران شہید ہوئے۔