پاکستانی باکسنگ کی دنیا میں تہلکہ خیز موڑ! اسلام آباد ہائیکورٹ کے جسٹس ارباب محمد طاہر نے پاکستان باکسنگ فیڈریشن کے سابق صدر خالد محمود اور دیگر عہدیداران پر لگائی گئی تاحیات پابندی اور 10 لاکھ روپے جرمانے کا حکم معطل کر دیا ہے۔

عدالت نے کیس کو پاکستان اسپورٹس بورڈ کے مجاز پینل کو بھجواتے ہوئے ہدایت جاری کی ہے کہ تمام فریقین کو سن کر غیر جانبدار فیصلہ دیا جائے۔

یہ کارروائی اس وقت منظر عام پر آئی جب اٹلی میں پاکستانی باکسنگ سکواڈ کے قیام کے دوران سنسنی خیز چوری کا واقعہ رپورٹ ہوا۔

مزید پڑھیں: پاکستان کی کھیلوں میں نئی تاریخ رقم، کھلاڑیوں کی حوصلہ افزائی کے لیے بڑا اقدام

اطلاعات کے مطابق، 3 مارچ 2024 کو پاکستانی نژاد برطانوی باکسر لاورا اکرم اور کوچ کے پیسے اور پاسپورٹ اس وقت غائب ہو گئے جب اسکواڈ کے رکن ذوہیب رشید اچانک لاپتہ ہو گیا۔

واقعہ کی تحقیقات اٹلی میں جاری ہیں، تاہم پاکستان اسپورٹس بورڈ نے ابتدائی طور پر ساری ذمہ داری باکسنگ فیڈریشن پر ڈال دی۔

درخواست گزاروں نے مؤقف اپنایا کہ واقعے کی مکمل تحقیقات سے قبل ہی پابندی اور جرمانہ عائد کیا گیا، جو انصاف کے تقاضوں کے منافی ہے۔ عدالت نے اس نکتے پر زور دیا کہ بغیر مناسب سماعت کے اس نوعیت کے فیصلے قابل قبول نہیں۔

اسپورٹس بورڈ کی جانب سے عدالت کو یقین دہانی کرائی گئی کہ بورڈ کا پینل فریقین کو سنے گا اور اس کے بعد دیا گیا فیصلہ مکمل طور پر نافذ العمل ہوگا۔