پاکستان مسلم لیگ (ن) کے قائد اور سابق وزیر اعظم میاں محمد نواز شریف نے لندن میں میڈیا سے گفتگو کرتے ہوئے عالمی برادری سے مطالبہ کیا ہے کہ وہ پاکستان کے جائز مسائل کے حل کے لیے مؤثر اور عملی اقدامات کرے۔

انہوں نے کہا کہ چین، تُرکیہ اور آذربائیجان ہمیشہ پاکستان کے ساتھ کھڑے رہے ہیں، اور دیگر ممالک کو بھی اسی جذبے کا مظاہرہ کرنا چاہیے۔

نواز شریف نے اقوام متحدہ کی جانب اشارہ کرتے ہوئے کہا کہ عالمی ادارے کو پاکستان کے مسائل کے حل کے لیے کلیدی کردار ادا کرنا چاہیے۔

ان کا کہنا تھا کہ اقوام متحدہ کو خود یہ احساس ہونا چاہیے کہ اس کی منظور کردہ قراردادوں، بالخصوص مسئلہ کشمیر پر، عمل درآمد کو یقینی بنانا صرف رکن ممالک ہی نہیں بلکہ خود ادارے کی ساکھ اور ذمہ داری ہے۔

سابق وزیراعظم نے کہا کہ مسئلہ کشمیر اور مسئلہ فلسطین آج بھی عالمی ضمیر کے لیے ایک امتحان ہیں۔ دونوں تنازعات کی مثالیں دنیا کے سامنے موجود ہیں اور انہیں مزید نظر انداز کرنا ممکن نہیں رہا۔

انہوں نے کہا کہ ان مسائل کا حل صرف خطوں کے لیے نہیں بلکہ عالمی امن کے لیے بھی ناگزیر ہے۔

نواز شریف نے کہا کہ پاکستان کا مؤقف امن، خودمختاری اور علاقائی استحکام پر مبنی ہے، جس کی بین الاقوامی سطح پر حمایت نہ صرف پاکستان کے لیے بلکہ عالمی اصولوں کی بقاء کے لیے بھی ضروری ہے۔