سویڈش ماحولیاتی اور انسانی حقوق کی کارکن گریٹا تھنبرگ کو اسرائیلی حکام کی جانب سے غزہ جانے والی امدادی کشتی پر دیگر کارکنوں کے ہمراہ حراست میں لیے جانے کے بعد رہا کر دیا گیا ہے، جس کے بعد وہ فرانس کے راستے سویڈن روانہ ہو گئیں۔

اسرائیلی وزارت خارجہ نے سماجی رابطے کی ویب سائٹ ایکس پر ایک پیغام میں بتایا کہ گریٹا تھنبرگ اب اسرائیل سے براستہ فرانس سویڈن کے لیے روانہ ہو گئی ہیں، ساتھ ہی ان کی جہاز میں موجودگی کی تصاویر بھی شیئر کی گئیں

22 سالہ تھنبرگ ایک عالمی شہرت یافتہ ماحولیاتی کارکن ہیں، جنہوں نے فضائی سفر سے اجتناب اختیار کر رکھا ہے اور 2019 میں نیویارک میں ہونے والی ایک ماحولیاتی کانفرنس میں شرکت کے لیے کشتی کے ذریعے سفر کیا تھا۔

مدلین نامی امدادی کشتی کو فریڈم فلوٹیلا کولیشن (FFC) نے منظم کیا تھا، جس پر کل 12 کارکن سوار تھے۔ تنظیم کے مطابق منگل کو ان میں سے چار کارکن اسرائیل چھوڑ چکے ہیں جن میں گریٹا تھنبرگ، دو فرانسیسی شہری اور ایک ہسپانوی کارکن شامل ہیں۔

فرانسیسی رکن یورپی پارلیمنٹ ریما حسن سمیت سات دیگر کارکن جو ترکی، نیدرلینڈز، فرانس، برازیل اور جرمنی سے تعلق رکھتے ہیں اب بھی حراست میں ہیں اور وسطی اسرائیل کے شہر راملہ میں واقع گیوون جیل میں قید ہیں۔

یورپی پارلیمنٹ کی ترجمان ڈلفین کولارڈ کے مطابق، یورپی پارلیمنٹ کے صدر مسلسل اسرائیلی حکام سے رابطے میں ہیں تاکہ ریما حسن اور ان کے ہمراہ دیگر افراد کی حفاظت اور سلامتی کو یقینی بنایا جا سکے۔

اسرائیل میں قائم غیر سرکاری قانونی تنظیم عدالہ ان گرفتار کارکنوں کی قانونی نمائندگی کر رہی ہے۔ فریڈم فلوٹیلا کا مقصد غزہ کے محصور شہریوں کو امداد پہنچانا اور اسرائیلی محاصرے کے خلاف پرامن احتجاج کرنا ہے۔