اسرائیل کی جانب سے غزہ کی مکمل ناکہ بندی کے بعد غذائی قلت ہولناک شکل اختیار کرچکی ہے، جس کے نتیجے میں کم از کم 66 بچے شہید ہوچکے ہیں۔

عالمی میڈیا کے مطابق غزہ کی مقامی انتظامیہ نے بتایا ہے کہ اسرائیلی جنگ کے دوران کم از کم 66 بچے شدید غذائی قلت کے باعث شہید ہو چکے ہیں، کیونکہ اسرائیل نے دودھ، غذائی سپلیمنٹس اور دیگر خوراکی امداد کی ترسیل روک دی ہے۔

اسرائیل کے حملوں میں تیزی، مزید 60 فلسطینی شہید

دوسری جانب اسرائیل کی جانب سے نہتے فلسطینیوں پر حملوں میں بھی شدت آچکی ہے اور اسرائیلی افواج کے تازہ ترین حملوں میں 60 فلسطینی شہید اور درجنوں زخمی ہوئے ہیں۔ جن میں سے 20 افراد غزہ سٹی کے تفہہ علاقے میں شہید ہوئے ہیں ۔

مزید پڑھیں: دنیا صرف طاقت کی زبان سمجھتی ہے ! ، غزہ کے مظلوم تاحال جنگ بندی کے منتظر

عالمی میڈیا کے مطابق غزہ کے حکام نے اس ناکہ بندی کو ایک “جنگی جرم” قرار دیا ہے، اور کہا ہے کہ اسرائیل شہریوں کو بھوک کے ذریعے “مٹانے” کی نیت رکھتا ہے ۔

بیان میں بین الاقوامی برادری کی “شرمناک خاموشی” پر بھی کڑی تنقید کی گئی، اور کہا گیا ہے کہ بچوں کو بھوک، بیماری اور سست موت کے رحم و کرم پر چھوڑ دیا گیا ہے ۔

غزہ کی مقامی انتظامیہ نے امریکہ، برطانیہ، جرمنی اور فرانس سمیت اسرائیل کے اتحادی ممالک کو بھی “اس تباہی” کا ذمہ دار ٹھہرایا، اور اقوام متحدہ سے مطالبہ کیا ہے کہ وہ فوری طور پر غزہ میں داخلے کے راستے کھولے۔

مزید پڑھیں: ٹرمپ کی جانب سے غزہ میں جنگ بندی کا عندیہ دینے کے بعد مزید 80 فلسطینی شہید

غذائی قلت سے بچوں کی اموات پر یونیسیف کا اظہار تشویش

UNICEF نے خبردار کیا ہے کہ غزہ میں شدید غذائی قلت کا شکار بچوں کی تعداد تیزی سے بڑھ رہی ہے۔

مئی میں 6 ماہ سے 5 سال کی عمر 5,119 بچے شدید غذائی قلت کے علاج کے لیے داخل ہوئے، جو اپریل کے 3,444 واقعات سے تقریباً 50٪ اور فروری کے مقابلے میں 150٪ زیادہ ہے۔

یونیسیف کے ایڈوارد بیگبیڈر نے بتایا کہ رواں سال کے پہلے 150 دنوں میں 16,736 بچوں کو علاج کے لیے داخل کیا گیا، اس طرح یومیہ اوسط 112 رہی۔

انہوں نے اس ضمن میں مطالبہ کیا کہ اسرائیل فوری طور پر تمام سرحدی راستوں سے بڑی مقدار میں “زندگی بچانے والی امداد” داخل ہونے کی اجازت دے۔