پاکستان کا ایک اعلیٰ سطحی پارلیمانی وفد سابق وزیر خارجہ بلاول بھٹو زرداری کی قیادت میں یورپی یونین کے صدر مقام برسلز پہنچ گیا ہے۔

یہ دورہ وفد کے واشنگٹن، نیویارک اور لندن کے دوروں کے بعد عمل میں آیا ہے، جس کا مقصد حالیہ پاک بھارت کشیدگی پر پاکستان کا مؤقف مؤثر انداز میں پیش کرنا ہے۔

پاکستانی سفارتخانے کی جانب سے جاری اعلامیے کے مطابق، وفد مسئلہ کشمیر کے پُرامن حل کی اہمیت کو اقوام متحدہ کی قراردادوں اور کشمیری عوام کی خواہشات کے تناظر میں اجاگر کرے گا۔

وفد بھارت کی جانب سے پھیلائی جانے والی غلط معلومات پر مبنی مہم کا مؤثر جواب دینے کے ساتھ ساتھ، اس کے جارحانہ عزائم اور خطے کے امن کو لاحق خطرات سے یورپی حکام کو آگاہ کرے گا۔

وفد میں وفاقی وزیر ڈاکٹر مصدق ملک، سینیٹر شیری رحمان، سابق وزیر خارجہ حنا ربانی کھر، سابق وزیر خرم دستگیر خان اور ایم کیو ایم کے سینیٹر فیصل سبزواری شامل ہیں۔

برسلز پہنچنے پر یورپی یونین، بیلجیئم اور لکسمبرگ میں پاکستان کے سفیر رحیم حیات قریشی اور دیگر سفارتی افسران نے وفد کا استقبال کیا۔

وفد کے شیڈول میں یورپی یونین، بیلجیئم کے اعلیٰ حکام، معروف تھنک ٹینکس اور بین الاقوامی میڈیا نمائندوں سے اہم ملاقاتیں شامل ہیں، جن کے دوران خطے کی صورتحال اور پاکستان کا مؤقف واضح انداز میں پیش کیا جائے گا۔