کومت پاکستان نے وزیراعظم شہباز شریف کے دور حکومت میں حاصل کی گئی اہم سفارتی کامیابیوں کی تفصیلات جاری کر دی ہیں، جن میں چین کی جانب سے پاکستان کو جدید دفاعی ٹیکنالوجی کی پیشکش نمایاں ہے۔

سرکاری اعلامیے کے مطابق چین نے پاکستان کو 40 ففتھ جنریشن J-35 اسٹیلتھ فائٹر طیارے، KJ-500 اواکس سسٹم اور HQ-19 ایئر ڈیفنس سسٹم فراہم کرنے کی پیشکش کی ہے۔

یہ ہتھیار پاکستان کی دفاعی صلاحیتوں میں نمایاں اضافہ کریں گے اور خطے میں اسٹریٹجک توازن برقرار رکھنے میں مددگار ثابت ہوں گے۔

مزید برآں چین نے پاکستان کو دیے گئے 3.7 ارب ڈالر قرض کی ادائیگی مؤخر کرنے پر آمادگی ظاہر کی ہے، جبکہ چینی ٹیکنالوجی کمپنی ہواوے کے تعاون سے ایک لاکھ پاکستانیوں کو مصنوعی ذہانت (AI) اور انفارمیشن ٹیکنالوجی (IT) میں تربیت دی جائے گی، جو ڈیجیٹل پاکستان کے وژن کو تقویت دے گی۔

اعلامیے میں یہ بھی بتایا گیا ہے کہ آذربائیجان نے 40 پاکستانی JF-17 لڑاکا طیاروں کی خریداری کے لیے 2 ارب ڈالر کی سرمایہ کاری کا معاہدہ کیا ہے، جبکہ دونوں ممالک کے درمیان 4.6 ارب ڈالر کے دفاعی معاہدوں پر بھی دستخط ہو چکے ہیں۔

دوسری جانب، پاکستان اور ایران کے درمیان تجارتی حجم کو آئندہ چند سالوں میں 3 سے 10 ارب ڈالر تک بڑھانے کی متفقہ کوششیں جاری ہیں، جو علاقائی اقتصادی استحکام اور تعاون کی نئی راہیں کھولیں گی۔